रशियाच्या मारिया शारापोवाने पोर्श्‍च ग्रांप्री टेनिस स्पर्धेत विजेतेपद पटकावले. अंतिम सामन्यात तिने बेलारूसच्या व्हिक्‍टोरिया अझारेन्कावर 6-1, 6-4 अशी मात केली. जागतिक क्रमवारीत अझारेन्का "नंबर वन' आहे. मोसमातील हे तिचे पहिलेच जेतेपद आहे. या कामगिरीसह शारापोवाला पोर्श्‍चची नवीकोरी कार बक्षीस मिळाली.
शारापोवासाठी ही कामगिरी सुखद ठरली. मोसमात चौथ्यांदा तिने अंतिम फेरी गाठली होती. ऑस्ट्रेलियन ओपन आणि इंडियन वेल्स या दोन स्पर्धांत तिला अझारेन्काकडूनच पराभूत व्हावे लागले होते. या वेळी शारापोवाने सर्व्हिसच्या जोरावर आक्रमक खेळ केला. खांद्यावरील शस्त्रक्रियेनंतर तिने सर्वोत्तम खेळ केला. तिने फोरहॅंडवर मारलेले बिनतोड फटके उल्लेखनीय ठरले. याशिवाय तिने बॅकहॅंडवरही सफाईदार खेळ केला. अझारेन्काला मनगटाच्या दुखापतीने त्रस्त केले होते. अझारेन्काने मोसमात 29 विजय आणि दोन पराभव अशी कामगिरी केली आहे. या पराभवानंतरही तिच्या अव्वल स्थानाला धोका नसेल.