एएफसी अंडर-23 : आशियाई चषक पात्रता फेरीत भारताचा UAE कडून पराभव

एएफसी अंडर-23 : भारताला मंगळवारी येथील डालियान सुओयुआन स्टेडियमवर UAE विरुद्ध 0-3 असा पराभव पत्करावा लागला आणि AFC U-23 आशियाई चषक 2024 पात्रता स्पर्धेतील त्यांची मोहीम सलग दुसऱ्या पराभवासह संपुष्टात आली. जी गटात भारत शेवटच्या स्थानावर आहे. यापूर्वी चीनविरुद्ध 1-2 असा पराभव स्वीकारावा लागला होता.

चार गुण आणि चांगल्या गोल फरकामुळे युएई संघ अव्वल स्थानावर राहिला. चीनचेही चार गुण आहेत. चीनला आता चार सर्वोत्कृष्ट दुसऱ्या स्थानावर असलेल्या संघांपैकी एक म्हणून पुढील फेरी गाठण्याची संधी आहे. भारत आणि यूएई या दोन्ही संघांनी सामन्यात वेगवान सुरुवात करत काही चांगल्या चाली केल्या. यूएईने 26व्या मिनिटाला मोहम्मद अब्बास अलबालुशीच्या गोलने आघाडी घेतली. या काळात भारतीय बचावपटू गोंधळलेला दिसला आणि रेफरीने त्याच्या सहाय्यकाशी दीर्घ चर्चेनंतर गोल बहाल केला.

सामन्याच्या 33 व्या मिनिटाला यूएईने आघाडी दुप्पट केली. सुलतान आदिल अलमिरीने संघासाठी दुसरा गोल केला. दोन गोलने पिछाडीवर पडल्यानंतर भारताने गती दाखवली. भारतीय खेळाडूंनी काही चांगल्या संधी निर्माण केल्या मात्र यूएईचा बचाव भेदण्यात ते अपयशी ठरले. हाफ टाईमपर्यंत यूएई संघ 2-0 ने आघाडीवर होता. उत्तरार्धात भारताने यूएईच्या बचावफळीवर दबाव आणला. पार्थिव गोगोईने उजव्या टोकाकडून चाल केली पण त्याचा क्रॉस भारतीय स्ट्रायकर्सच्या आवाक्याबाहेर राहिला.

भारताचे मुख्य प्रशिक्षक क्लिफर्ड मिरांडा यांनी संजीव स्टॅलिन आणि गोगोई यांच्या जागी रबीह अंजुकंदन आणि सौरव यांना स्थान दिले पण संघ गोल करण्यात अपयशी ठरला. दरम्यान, यूएईने पलटवार करत ईशा खलफानच्या गोलमुळे स्कोअर 3-0 असा केला, जो विजयी स्कोअर ठरला.

Edited by - Priya Dixit