संसार म्हटला की भांड्याला भांडे लागणारच! पण तो संसार दोन कुस्तीपटूंचा असेल तर? अशा वेळी प्रकरण गंभीर होऊ शकते! म्हणूनच की काय, भारताचा धडाकेबाज फलंदाज व वैयक्तिक आयुष्यात ति‍तकीच हजरजवाबी फटकेबाजी करणार्‍या विरेंद्र सेहवागने साक्षी मलिकला तिच्या विवाहाबद्दल संसारात, नो कुस्ती अशा गमतीशीर शुभेच्छा दिल्या आहेत.
रिओ ऑलिम्पिकमध्ये कांस्य पदक पटकावणारी साक्षी विवाहबंधनात अडकली. हरियाणातील रोहतकजवळ असलेल्या साक्षीच्या नांदल गावात कुस्तीपटू सत्यव्रत कादियनला तिने वरमाला घातली. गृहस्थाश्रमात प्रवेश करणार्‍या साक्षीवर मान्यवर व चाहत्यांकडून शुभेच्छांचा वर्षाव होत आहे. सोशल मीडियावर अत्यंत सक्रिय असलेला क्रिकेटपटू सेहवागने खास ट्विट करून साक्षीचे काहीसे हटके अभिनंदन केले. त्याची ही शुभेच्छाही सोशल मीडियात चर्चेचा विषय ठरली आहे.
सुखी वैवाहिक जीवनासाठी साक्षी मलिकला हार्दिक शुभेच्छा. आयपीएलच्या सराव शिबिरामुळे लग्नाला येता आले नाही. पण तुझ्या सुखी संसारासाठी माझ्या शुभेच्छा आहेत. आणि हो, संसारात कुस्ती नको, असे मिश्कील ट्विट विरूने केले आहे.