IPL 2021 : उरलेली स्पर्धा आम्ही भरवतो, इंग्लिश काऊंटींनी दाखवली तयारी
शुक्रवार, 7 मे 2021 (19:09 IST)
अर्ध्यातून रद्द करण्यात आलेली इंडियन प्रिमियर लीग - IPL स्पर्धा भरवण्याची तयारी काही काऊंटींनी इंग्लंड आणि वेल्स क्रिकेट बोर्डाकडे दर्शवली आहे.
आयपीएलमधले काही खेळाडू पॉझिटिव्ह आढळल्यानंतर मंगळवारी उरलेली IPL स्पर्धा रद्द करण्यात आली होती.
उर्वरित सामने खेळवण्यासाठी नवीन जागेचा शोध घेण्यात येतोय का, हे बीसीसीआय (BCCI)ने स्पष्ट केलं नव्हतं.
पण आता वॉर्कविकशायर, सरे आणि मार्लिबोन क्रिकेट क्लब (लॉर्ड्स)ने आपल्याला यात रस असल्याचं म्हटल्याचं वृत्त क्रिकइन्फोने दिलंय.
यामध्ये आधी लँकेशायरचं नावंही घेतलं जात होतं, पण त्यांनी त्यांचं ओल्ड ट्रॅफर्ड मैदान देऊ केलं नसल्याचं समजतंय.
इंग्लंड क्रिकेट बोर्डाच्या प्रवक्त्यांनी सांगितलं, "आम्ही बीसीसीआयसोबत टूर आणि इतर बाबींबद्दल बोलत असतो आणि यापुढेही ते करत राहू. पण ते आताच्या घडीला IPL भरवण्यासाठी दुसरी जागा शोधत आहेत का, याची आम्हाला काहीही कल्पना नाही."
IPL 2021 मधले 31 सामने शिल्लक आहेत. हे सामने पुन्हा आयोजित कराये झाले तर आंतरराष्ट्रीय क्रिकेट सामन्यांचं भरगच्च वेळापत्रक सांभाळून ते करावं लागेल.
भारतासोबतची 5 टेस्ट मॅचची सिरीज संपवून इंग्लंडची टीम 14 सप्टेंबरला बांगलादेश आणि पाकिस्तानला जाणार आहे. त्यानंतर ऑक्टोबर महिन्यात भारतामध्ये टी20 वर्ल्ड कप होणार आहे.
सप्टेंबरच्या अखेरीस युकेमध्ये उरलेले आयपीएल सामने भरवले तर इंग्लंड आणि भारताच्या टीम्स एकाच ठिकाणी असतील तर इतरही काही आंतरराष्ट्रीय खेळाडू द हंड्रेड स्पर्धेनंतर याच देशात असण्याची शक्यता आहे.