बॉलिवूडचा खिलाडी अक्षय कुमार आणि टायगर श्रॉफ स्टारर 'बडे मियाँ छोटे मियाँ' हा चित्रपट सतत चर्चेत असतो. चित्रपटाचा टीझर आणि गाणी रिलीज झाल्यापासून या चित्रपटाविषयी प्रेक्षकांमध्ये प्रचंड उत्साह आहे. प्रेक्षकांचा उत्साह पाहून चित्रपटाच्या निर्मात्यांनी आज 'बडे मियाँ छोटे मियाँ'चा धमाकेदार ट्रेलर रिलीज केला आहे. चित्रपटाचा ट्रेलर खूपच मनोरंजक आहे. यामध्ये अक्षय-टायगर जबरदस्त ॲक्शन करताना दिसत आहेत.
बडे मियाँ छोटे मियाँ'च्या निर्मात्यांनी आज, मंगळवार, 26 मार्च रोजी चित्रपटाचा ट्रेलर प्रदर्शित केला आहे. या ट्रेलरमध्ये गोळीबार आणि बॉम्बस्फोटांसोबतच शक्तिशाली ॲक्शन आहे. अक्षय कुमार आणि टायगर श्रॉफ एका वेगळ्या लेवलचे स्टंट करताना दिसले आहेत. यामध्ये दोन्ही स्टार्स देशाच्या अशा शत्रूचा खात्मा करण्यासाठी निघाले आहेत, ज्याच्याबद्दल कोणालाही काहीही माहिती नाही. हे शत्रू देशाच्या विनाशाची स्वप्ने पाहत आहेत. अक्षय-टायगरची शत्रूशी लढाई चित्रपटात पाहायला मिळणार आहे.
टायगर आणि अक्षय ट्रेलरमध्ये 'आम्ही मनाने सैनिक, मनाने सैतान... बच के रहना हमसे हिंदुस्तान हैं हम' असे म्हणताना दिसत आहेत. अक्षय-टायगरची जोडी आपापल्या शैलीत शत्रूला हरवू लागते. पण ट्रेलरच्या शेवटी ही ॲक्शन जोडी एकमेकांची शत्रू बनते. अक्षय कुमार आणि टायगर श्रॉफ सोबत, मानुषी छिल्लर आणि सोनाक्षी सिन्हा देखील चमकदार कामगिरी करताना दिसल्या आहेत.
या चित्रपटात अक्षय कुमार, टायगर श्रॉफ, आलिया एफ आणि मानुषी छिल्लरशिवाय पृथ्वीराज सुकुमारन, सोनाक्षी सिन्हा यांच्याही महत्त्वाच्या भूमिकेत दिसणार आहे. या चित्रपटाचे लेखन आणि दिग्दर्शन अली अब्बास जफर यांनी केले आहे. वाशू भगनानी, दीपशिखा देशमुख, जॅकी भगनानी, हिमांशू किशन मेहरा आणि अली अब्बास जफर हे त्याचे निर्माते आहेत. 10 एप्रिल 2024 रोजी ईदच्या मुहूर्तावर हा चित्रपट मोठ्या पडद्यावर प्रदर्शित होणार आहे.