छोट्या पडद्यापासून बॉलिवूडपर्यंत यशस्वी प्रवास करणारा अभिनेता सुशांत सिंह राजपूतच्या अकाली एक्झिटनं सगळ्यांनाच धक्का बसला. कूपर रुग्णालयात सुशांतच्या मृतदेहाचं पोस्टमार्टम करण्यात आलं. यामधून त्यानं आत्महत्याच केल्याचं समोर आलं आहे. कूपर रुग्णालयातून सुशांतचा मृतदेह पुढील तपासणीसाठी जे. जे. रुग्णालयात पाठवण्यात आला आहे. सुशांतच्या अवयवांमध्ये कोणत्याही प्रकारचं विष आहे का, याची तपासणी जे. जे. रुग्णालयात केली जाईल.
सुशांत सिंह राजपूतच्या आत्महत्येनं सगळ्यांनाच मोठा धक्का बसला. त्याच्या आत्महत्येचं नेमकं कारण अद्याप समोर आलेलं नाही. मात्र पोलिसांनी दिलेल्या माहितीनुसार, सुशांतवर मानसोपचार सुरू होते. त्याबद्दलची काही कागदपत्रंदेखील त्याच्या घरात पोलिसांनी सापडली. त्यामुळे नैराश्यातून सुशांतनं टोकाचं पाऊल उचललं असावं, असा प्राथमिक अंदाज व्यक्त केला जात आहे.