निर्माता-दिग्दर्शक संजय लीला भन्साळी यांच्या आगामी पद्मावती सिनेमाच्या चित्रीकरणा दरम्यान पुन्हा एकदा सेटवर तोडफोड झाली आहे. कोल्हापुरातही सिनेमाच्या चित्रीकरणाला विरोध करत अज्ञातांनी सेटवर तोडफोड केली. मंगळवारी रात्री उशीरा ही घटना घडली आहे. पन्हाळगडावरील मसाई पठारवर सिनेमाचे चित्रीकरण सुरू होते. यावेळी अज्ञातांनी सेटवरील गाड्यांची तोडफोड करत जाळपोळ करण्याचाही प्रयत्न केला. घटनेची माहिती मिळताच पन्हाळा पोलीस घटनास्थळी दाखल झाले. यापूर्वी जयपूरमधील सिनेमाच्या सेटवर तोडफोड आणि मारहाणीचा प्रकार घडला होता. या प्रकारामुळे संजय लीला भन्साळी यांना तेथील चित्रीकरण थांबवावे लागले होते.