Royal Challengers Bangalore vs Chennai Super Kings : चार वेळा चॅम्पियन चेन्नई सुपर किंग्ज (CSK) आज IPL 2023 च्या 24 व्या सामन्यात रॉयल चॅलेंजर्स बंगळुरू (RCB) विरुद्ध खेळणार आहे. बंगळुरू येथील एम चिन्नास्वामी स्टेडियमवर हा सामना होणार आहे. सीएसके संघ डावाच्या मध्यावर धावगती वाढविण्याचा प्रयत्न करेल. यासोबतच गुडघ्याच्या दुखापतीनंतरही धोनी मॅच तंदुरुस्त राहू शकेल, अशी आशा CSK संघाला असेल.
चेन्नई आणि बंगळुरू या दोन्ही संघांसाठी आतापर्यंतची मोहीम चढ-उतारांनी भरलेली आहे. चेन्नईने या मोसमात आतापर्यंत चार सामने खेळले आहेत. यातील संघाने दोन सामने जिंकले असून दोन सामन्यात पराभवाचा सामना करावा लागला आहे. CSK गुजरात टायटन्स आणि राजस्थान रॉयल्स विरुद्ध हरले आहे, तर संघ लखनौ सुपरजायंट्स आणि मुंबई इंडियन्स विरुद्ध जिंकला आहे.
दोन्ही संघ आतापर्यंत 30 वेळा आमनेसामने आले आहेत. यापैकी चेन्नईने 19 सामने जिंकले, तर बंगळुरूने 10 सामने जिंकले. एक सामना अनिर्णित राहिला. या दोघांमधील गेल्या पाच सामन्यांपैकी धोनीच्या संघाने चार सामने जिंकले आहेत. एम चिन्नास्वामी स्टेडियमवर या सामन्यासाठी विशेष वातावरण असेल. 41 वर्षीय धोनी स्पर्धेच्या सुरुवातीपासूनच गुडघ्याच्या समस्येने त्रस्त आहे, परंतु त्याने आतापर्यंत संघाच्या चारही सामन्यांमध्ये सहभाग नोंदवला आहे.राजस्थानविरुद्ध घरच्या मैदानात झालेल्या पराभवानंतर धोनीच्या पायात अस्वस्थता दिसून येत होती. मात्र, आठव्या क्रमांकावर उतरलेल्या धोनीच्या प्रयत्नात कोणतीही कमी पडली नाही. शेवटच्या चेंडूवर संघाचा पराभव झाला.
रॉयल चॅलेंजर्स बंगलोर (आरसीबी) ने गेल्या सामन्यात दिल्ली कॅपिटल्सविरुद्ध विजय मिळवला आहे आणि तीच लय कायम ठेवू इच्छित आहे. संघाचा स्टार फलंदाज विराट कोहलीचा फॉर्म सर्वात मोठा सकारात्मक आहे.