दुनियादारी, प्यारवाली लव्हस्टोरी या सिनेमांना बॉक्स ऑफीसवर चांगलाच प्रतिसाद मिळाला. प्रेक्षकांना 'प्रेम', 'मैत्री' या नात्यावर विश्वास ठेवायला शिकवलं ते या दोन सिनेमांनी. प्यारवाली लव्हस्टोरीने प्रेमाच्या एका अनोख्या जगात नेलं तर दुनियादारीने मैत्रीची सफर घडवून आणली. या दोन्ही सिनेमाचे मेकर असलेले संजय जाधव आपल्या समोर अजून एक लव्हस्टोरी घेऊन येतायत. नुकतचं या सिनेमाचा मुहूर्त रोमॅंटिक गाण्याच्या रेकॉर्डिंगने पार पडला.
तू ही रे असं या सिनेमाच नाव असून स्वप्नील जोशी, सई ताम्हणकर, तेजस्विनी पंडित यांच्या प्रमुख भूमिका आपल्याला पाहायला मिळणार आहे. आजीवसनमध्ये सिनेमाच्या गाण्याच रेकॉर्डिंग झालं. एकंदरच रोमॅंटिक सागा असलेल्या या सिनेमाचे संगीत दिग्दर्शक अमितराज आणि पंकज पडघन आहेत. सिनेमाची गीते गुरू ठाकुर यांनी लिहिलीआहे. मात्र गाण्याच्या रेकॉर्डिंगची सुरुवात झाली ती अमितराज दिग्दर्शित गाण्याने. हे गाणं आदर्श शिंदे यांच्या आवाजात स्वरबद्ध करण्यात आलंय.
मनस्विनी लता रविंद्र यांनी सिनेमाची कथा लिहिली असून करण एंटरटेनमेंट तसेच इंडियन फिल्म्स स्टूडिओ आणि संजय जाधव यांच्या ड्रिमिंग २४/७ या बॅनर खाली सिनेमाची निर्मिती होणार आहे. दुनियादारी, प्यारवाली लव्हस्टोरी प्रमाणेच याही सिनेमात आपल्याला तगडी स्टारकास्ट पाहायला मिळणार आहे. संजय जाधव यांच्या याही सिनेमाचं वेड प्रेक्षकांना लागेल यात तीळमात्र शंका नाही. या वर्षीच्या सप्टेंबर महिन्यात हा सिनेमा आपल्या भेटीला येणार आहे. तेव्हा उत्सुकता ताणून धरा तू ही रे सिनेमाची...