हरभजन चेन्नईत खेळणार शंभरावी कसोटी

२००१ मध्ये ऑस्ट्रेलियन फलंदाजांना सळो की पळो करून सोडल्यानंतर 'टर्बोनेटर' म्हणून ख्यात पावलेला हरभजन सिंह शुक्रवारी कांगारूंविरूद्ध चेन्नईच्या मैदानात उतरताना थोडा नर्व्हस असेल, कारण हा त्याच्या कारकीर्दीतील शंभरावा कसोटी सामना असेल.

कांगारूंविरूद्ध कहर बरसवणार्‍या हरभजनला त्यांच्याविरूद्धच ही संधी मिळावी, हाही एक योगायोगच. त्याने ९९ कसोटीत ४०८ बळी घेतले आहेत. शंभर कसोटी पूर्ण करणारा हरभजन हा दहावा भारतीय क्रिकेटपटू आहे. ऑस्ट्रेलियाविरूद्ध खेळणे नेहमीच आव्हानात्मक असते आणि आव्हानांचा सामना करणे त्याला नेहमीच आवडते.

याअगोदरही आपण खडतर परिस्थितीतून गेलो असून आता कारकीर्दीत आणखी ५० कसोटी जोडण्याचे लक्ष असल्याचे त्याने सांगितले.