टीम इंडियाचे माजी कर्णधार आणि बीसीसीआयचे अध्यक्ष सौरव गांगुलींनी 1 जूनला संध्याकाळी एक ट्वीट करत चाहत्यांना संभ्रमात टाकलं. त्यांनी बीसीसीआयच्या अध्यक्षपदाचा राजीनामा दिल्याच्या चर्चा सुरू झाल्या.
त्यांच्या राजकारण प्रवेशाच्या शक्यतांवरून अनेक सोशल मीडिया युझर्सने प्रतिक्रिया दिल्या. पण काही वेळातच बीसीसीआय सचिव जय शाह यांनी गांगुलीने राजीनामा दिला नसल्याचं सांगितलं.
स्वतः सौरव गांगुलीही यांनी दुसरं ट्वीट करून स्पष्टीकरण दिलं की त्यांनी एक जागतिक शैक्षणिक अॅप लॉन्च केलेलं आहे.
सौरव गांगुलींनी आपल्या पहिल्या ट्वीटमध्ये लिहिलं होतं की, '1992 साली माझ्या क्रिकेटच्या प्रवासाला सुरूवात झाली. 2022 मध्ये आता याला 30 वर्ष पूर्ण होत आहेत. तेव्हापासून क्रिकेटने मला बरंच काही दिलं आहे. या प्रवासात मला पाठिंबा दिलेल्या प्रत्येकाचे मनापासून आभार. त्यांच्या मदतीमुळे मी इथपर्यंत पोहोचलो आहे. मी आजपासून काहीतरी नवीन सुरू करण्याची योजना आखत आहे, ज्यामुळे अनेकांना मदत मिळेल. आयुष्याच्या नव्या पर्वांत तुमच्या सगळ्यांचा असाच पाठिंबा मिळत राहिल, अशी आशा करतो."