भारत आणि श्रीलंका यांच्यातील टी-20 मालिकेतील तिसरा आणि शेवटचा सामना राजकोट, गुजरातमध्ये आहे. मालिकेच्या निर्णायक सामन्यासाठी भारतीय संघ राजकोटला पोहोचला आहे. भारतीय संघाचे राजकोटमध्ये गुजरातच्या स्थानिक परंपरेनुसार स्वागत करण्यात आले. सांघिक बसमधून खाली उतरलेल्या खेळाडूंना पुष्पहार घालण्यात आला. पारंपारिक वेशभूषेत उपस्थित मुलींनी नृत्याने खेळाडूंचे स्वागत केले. खेळाडूंना टिळक लावण्यात आले व पुष्पहारही घालण्यात आला. यावेळी उपस्थितांनी भारत... भारत... अशा घोषणा दिल्या. टीम इंडियाचे नंतर भारत माता की जय आणि वंदे मातरमच्या घोषणांनी स्वागत करण्यात आले.
सध्या तीन सामन्यांच्या टी-२० मालिकेत भारत आणि श्रीलंकेने प्रत्येकी एक सामना जिंकला आहे. मालिका बरोबरीत असून तिसरा सामना जिंकणारा संघ मालिका जिंकेल. या मालिकेतील पहिल्या सामन्यात भारताने शानदार खेळ करत दोन धावांनी रोमहर्षक विजय मिळवला. त्याचवेळी दुसऱ्या सामन्यात श्रीलंकेच्या संघाने शानदार पुनरागमन करत 16 धावांनी विजय मिळवला.
या मालिकेत हार्दिक पांड्याकडे भारताच्या T20 संघाचे कर्णधारपद सोपवण्यात आले आहे. हार्दिकच्या नेतृत्वाखाली भारताने बहुतांश सामने जिंकले आहेत, मात्र या मालिकेत भारताचा कर्णधार म्हणून हार्दिकला प्रथमच पराभवाला सामोरे जावे लागले आहे. त्याच्या कर्णधारपदाखाली हार्दिकने चेंडूवर कमालीची चांगली कामगिरी केली आहे.