टी-20 विश्वचषक स्पर्धेच्या सुपर-8 फेरीत वीरेंद्र सेहवागच्या खेळण्यावरून सुरू असलेल्या सर्व शंकाकुशंकांना पूर्णविराम मिळाला आणि सेहवागने सकाळच्या सुमारास अर्धा तास मुक्तपणे फलंदाजीचा सराव करून आपण पूर्णपणे 'फिट' असल्याचे दाखवून दिले.
भारत आणि ऑस्ट्रेलियादरम्यान येत्या शुक्रवारी सुपर-8 फेरीची लढत होणार असून, अंगठ्याला झालेल्या दुखापतीमुळे सेहवाग या सामान्यात खेळू शकणार नसल्याची शंका व्यक्त करण्यात येत होती. त्याने मंगळवारीही सरावसत्रात सहभाग घेतला नाही. त्यामुळे ही शंका अधिकच दाट झाली. परंतु बुधवारी पी. सरा ओव्हल स्टेडियमवर सेहवाग संघसहकार्‍यांसह आपली किट घेऊन मैदानात उतरला. त्याने सर्वप्रथम फिरकीपटूंच्या गोलंदाजीवर फलंदाजी केली.