मुंबईत एक धक्कादायक घटना समोर आली आहे. जिथे एका मुलीला वडिलांचे पीएफचे पैसे देण्याच्या बदल्यात शारीरिक संबंध ठेवण्याची अट घालण्यात आली होती. याप्रकरणी पीडितेच्या तक्रारीवरून खासगी कंपनीच्या एचआर मॅनेजरविरुद्ध गुन्हा दाखल करण्यात आला आहे.
मिळालेल्या माहितीनुसार, वांद्रे (पूर्व) येथे राहणाऱ्या 23 वर्षीय तरुणीचे वडील एका खासगी कंपनीत कामाला होते. 2015 मध्ये वडिलांचे निधन झाले. तेव्हापासून त्यांचे पीएफचे पैसे अडकले होते. एचआर मॅनेजरने तिच्या मृत वडिलांचे पीएफचे पैसे देण्याच्या बदल्यात मुलीकडे शारीरिक संबंधांची मागणी केल्याचा आरोप आहे. त्यानंतर मुलीने एचआर मॅनेजरविरोधात पोलिसात तक्रार दाखल केली.
पीडितेच्या तक्रारीवरून मुंबईच्या खेरवाडी पोलिसांनी आरोपीविरुद्ध माहिती तंत्रज्ञान कायदा आणि भारतीय दंड विधानाच्या विविध कलमान्वये गुन्हा दाखल केला आहे. मात्र त्याला अद्याप अटक करण्यात आलेली नाही.
तक्रारदार तरुणी ही घरकाम करते. ती तिचा लहान भाऊ आणि आजीसोबत राहते. तिच्या पालकांचा काही वर्षांपूर्वी घटस्फोट झाला होता. दरम्यान 2015 मध्ये वडिलांनी जगाचा निरोप घेतला. त्यावेळी पीडितेचे वय अवघे 15 वर्षे होते. त्यामुळे ती तिच्या वडिलांच्या कंपनीने कापलेल्या पीएफवर दावा करू शकली नाही. तर वडिलांनी आपल्या मुलीलाही त्यांच्या पीएफसाठी नॉमिनी बनवले होते. वयात आल्यावरही पीएफची रक्कम न मिळाल्याने त्यांनी कार्यालयात फेऱ्या मारण्यास सुरुवात केली.
मुलीने तिच्या मृत वडिलांच्या पीएफचा दावा करण्यासाठी आवश्यक फॉर्म देखील भरले. मात्र पीएफची रक्कम मिळाली नाही. नंतर तिला कळले की त्यांच्या पीएफच्या दाव्याशी संबंधित फाइल कंपनीच्या एचआर मॅनेजरकडे अडकली आहे. जेव्हा ती एचआर मॅनेजरकडे गेली तेव्हा त्याने तिचा पीएफ फंड सोडण्याच्या बदल्यात शारीरिक संबंधांची मागणी केली. यानंतर तरुणीने थेट खेरवाडी पोलिस ठाण्यात जाऊन तक्रार दाखल केली. पोलीस या प्रकरणाचा तपास करत आहेत.