महाराष्ट्र: अनिल देशमुख यांनी गिरीश महाजन यांच्यावर आरोपी होण्यासाठी दबाव आणला होता, सीबीआयच्या तपासात उघड

सीबीआयने महाराष्ट्राचे माजी गृहमंत्री अनिल देशमुख यांच्याविरोधात भाजप नेत्याला खोट्या प्रकरणात अडकवण्याचा प्रयत्न केल्याप्रकरणी नवीन एफआयआर दाखल केला आहे. दोन वर्षांच्या प्राथमिक तपासानंतर सीबीआयने गुन्हा दाखल केला आहे.

मिळालेल्या माहितीनुसार तत्कालीन विरोधी पक्षनेते देवेंद्र फडणवीस यांनी महाराष्ट्र विधानसभा अध्यक्षांना दिलेल्या पेन ड्राईव्हच्या आधारे ही चौकशी करण्यात आली होती. तसेच हा तपास आधी सीआयडीकडे आणि नंतर सीबीआयकडे सोपवण्यात आला. यामध्ये देशमुख यांच्यासह आणखी पाच जणांची नावे आहेत.

हे प्रकरण महाविकास आघाडी सरकारमध्ये गृहमंत्री असलेले अनिल देशमुख यांनी भाजपचे ज्येष्ठ नेते आणि राज्य सरकारचे मंत्री गिरीश महाजन यांना खोट्या प्रकरणात अडकवण्याचा केलेला प्रयत्न आहे.

अनिल देशमुख गृहमंत्री असताना त्यांनी जळगावच्या एसपींना अनेकदा फोन करून सुमारे तीन वर्षे जुन्या एका प्रकरणात मला आरोपी बनवण्यासाठी दबाव आणल्याचा आरोप महाजन यांनी केला आहे.  

9 डिसेंबर 2020 रोजी या प्रकरणी एफआयआर देखील नोंदवण्यात आला होता. काही महिन्यांनंतर देवेंद्र फडणवीस यांनी विधानसभेत हा मुद्दा उपस्थित केला आणि काही लोकांच्या संभाषणांशी संबंधित एक पेन ड्राईव्ह विधानसभा अध्यक्षांकडे चौकशीसाठी दिला. कमीतकमी दोन वर्षे चाललेल्या या प्रकरणाच्या प्राथमिक तपासानंतर बुधवारी या तपासाच्या आधारे सीबीआयने माजी गृहमंत्री अनिल देशमुख यांच्यासह आणखी पाच जणांविरुद्ध एफआयआर नोंदवली आहे.