अनंत अंबानींच्या लग्नाआधीच्या सोहळ्याला अन्नसेवेने सुरुवात, 51 हजार लोकांना जेवण देण्यात येणार

जामनगर- अंबानी कुटुंबाचा धाकटा मुलगा आणि उद्योगपती अनंत अंबानी आणि राधिका मर्चंट यांच्या लग्नाआधीच्या कार्याची सुरुवात अन्न सेवेने झाली. जामनगरमधील रिलायन्स टाउनशिपजवळील जोगवाड गावात, मुकेश अंबानी, अनंत अंबानी आणि राधिका मर्चंटसह अंबानी कुटुंबातील इतर सदस्यांनी गावकऱ्यांना पारंपारिक गुजराती जेवण दिले. राधिकाची आजी आणि आई-वडील वीरेन आणि शैला मर्चंट यांनीही अन्न सेवेत भाग घेतला. सुमारे 51 हजार स्थानिक रहिवाशांना जेवण दिले जाईल. जे पुढील काही दिवस सुरू राहणार आहे.

अनंत अंबानी आणि राधिका मर्चंट यांच्या लग्नाआधीच्या सोहळ्यांसाठी स्थानिक समुदायाचा आशीर्वाद घेण्यासाठी अंबानी कुटुंबाने अन्न सेवा आयोजित केली आहे. भोजनानंतर उपस्थितांनी पारंपरिक लोकसंगीताचा आस्वाद घेतला. सुप्रसिद्ध गुजराती गायक कीर्तिदान गढवी यांनी आपल्या गायनाने या कार्यक्रमात धुमाकूळ घातला.

अंबानी कुटुंबात जेवण देण्याची परंपरा जुनी आहे. अंबानी कुटुंब शुभ कौटुंबिक प्रसंगी भोजन देत आहे. कोरोना महामारीच्या काळात देश संकटात असतानाही अनंत अंबानी यांच्या आई नीता अंबानी यांच्या नेतृत्वाखाली रिलायन्स फाऊंडेशनने जगातील सर्वात मोठा अन्न वितरण कार्यक्रम राबवला. कौटुंबिक परंपरेला पुढे नेत अनंत अंबानी यांनी त्यांच्या लग्नाआधीची कार्ये अन्न सेवेसोबत सुरू केली आहेत.