बिहारमधील नालंदा येथील कुल गावात 3 वर्षाचे बालक खेळताना 40 फूट खड्ड्यात बोअरवेलमध्ये पडले. या प्रकरणाची माहिती मिळताच आजूबाजूचे लोक घटनास्थळी पोहोचले. लोकांनी पोलिसांना माहिती दिली, त्यानंतर पोलिसांचे पथक घटनास्थळी पोहोचले आणि जेसीबीमधून मुलाला बाहेर काढण्याचे काम सुरू केले.
लोकांचे म्हणणे आहे की, मुलगा आईच्या मागे शेताकडे जात असताना त्याचा पाय घसरला आणि तो बोअरवेलमध्ये पडला. कुल गावातील रहिवासी डोमन मांझी यांचा 3 वर्षांचामुलगा शिवम कुमार असे या मुलाचे नाव आहे. बोअरवेलमध्ये बालक पडल्याचा आवाज येत असल्याचे ग्रामस्थांनी सांगितले.
घटनेची माहिती पोलीस-प्रशासनाला देण्यात आली. माहिती मिळताच पोलीस पथक आणि अधिकारी घटनास्थळी दाखल झाले. तातडीने जेसीबी बोलवून बचावकार्य सुरू करण्यात आले. पोलीस अधिकाऱ्यांनी सांगितले की, बोअरवेलमध्ये पडलेल्या मुलाला वाचवण्यासाठी बचावकार्य सुरू आहे
यासाठी एनडीआरएफ, एसडीआरएफच्या पथकांनाही घटनास्थळी पाचारण करण्यात आले आहे. वैद्यकीय पथकही घटनास्थळी हजर आहे. बोअरवेलमध्ये ऑक्सिजन पोचवला जात आहे.
लोकांचे म्हणणे आहे की, गावात सिंचनासाठी बोअरवेल खोदली जात होती, त्यामध्ये मुलगा पडला. सध्या बचावकार्य सुरू आहे. मुलाच्या आईने सांगितले की, ती शेतात काम करत होती, मूल तिथे खेळत होते. अचानक त्याचा पाय घसरला आणि तो बोअरवेलमध्ये पडला. या घटनेनंतर कुटुंबीयांमध्ये खळबळ उडाली आहे.
शिवम ला वाचवण्यासाठी बचावकार्य सुरू आहे. एनडीआरएफसोबतच जिल्हा प्रशासनाचे पथकही कारवाईत गुंतले आहेत. शिवम सुमारे 40 फूट खोल बोअरवेलमध्ये अडकला आहे. जेसीबीद्वारे बोअरवेलला समांतर खोदकाम करण्यात येत आहे. त्यानंतर समोरून जागा करून शिवमला बाहेर काढले जाईल. नालंदाचे खासदार कौशलेंद्र कुमारही बचावकार्यासाठी पोहोचले आहेत.