ED Officer Attested: ईडीवर पोलिसांचा छापा

ED Official Arrested In Tamilnadu: तामिळनाडूमध्ये, अंमलबजावणी संचालनालयाच्या (ईडी) एका अधिकाऱ्याला पोलिसांनी फिल्मी शैलीत अटक केली आहे. सुमारे आठ किलोमीटरपर्यंत कारचा पाठलाग केल्यानंतर त्याला सरकारी कर्मचाऱ्याकडून 20 लाख रुपयांची लाच घेताना रंगेहात पकडण्यात आले. अंकित तिवारी असे त्याचे नाव आहे.

पीटीआय या वृत्तसंस्थेच्या वृत्तानुसार, दक्षता आणि लाचलुचपत प्रतिबंधक संचालनालयाने (DVAC) शुक्रवारी (1 डिसेंबर) याबाबत तपशीलवार स्पष्टीकरण दिले आहे. वसुलीसाठी तो पंतप्रधान कार्यालयाचे (पीएमओ) नाव वापरत असल्याचे उघड झाले आहे.

पोलिसांनी ईडी कार्यालयाची झडती घेतली

दिंडीगुलमध्ये ताब्यात घेतल्यानंतर, DVAC अधिकाऱ्यांच्या पथकाने मदुराई येथील उप-प्रादेशिक ईडी कार्यालयात 'तपास' केला, तर राज्य पोलिस कर्मचारी केंद्र सरकारच्या कार्यालयाबाहेर तैनात करण्यात आले होते. अंकित केंद्र सरकारच्या मदुराई अंमलबजावणी विभाग कार्यालयात अंमलबजावणी अधिकारी म्हणून कार्यरत आहे. आरोपीला 15 डिसेंबरपर्यंत न्यायालयीन कोठडी सुनावण्यात आली आहे. या अटकेनंतर त्याच्या दिंडीतील घरावरही छापा टाकण्यात आला.

ईडीच्या अनेक अधिकाऱ्यांचा सहभाग असल्याचा दावा

पोलीस सूत्रांचे म्हणणे आहे की, या प्रकरणाच्या तपासात मदुराई आणि चेन्नई येथील अनेक ईडी अधिकारी या लाचखोरी घोटाळ्यात सामील असल्याचे उघड झाले आहे. तिवारी अनेकांना ब्लॅकमेल करून कोट्यवधी रुपये उकळत होता. केंद्रीय एजन्सीच्या अधिकाऱ्यांच्या संपूर्ण टोळीच्या मदतीने ही वसुली करण्यात आल्याचा दावा केला जात आहे.

ईडीचे अधिकारी पीएमओच्या नावाने ब्लॅकमेल करायचे

सूत्रांवर विश्वास ठेवायचा झाल्यास, अंकित तिवारीने 29 ऑक्टोबर रोजी दिंडीगुलच्या एका सरकारी कर्मचाऱ्याशी त्याच्यावर दाखल झालेल्या जुन्या गुन्ह्याच्या संदर्भात संपर्क साधला होता. सरकारी कर्मचाऱ्यांना घाबरवण्यासाठी तिवारी म्हणाले की, पीएमओने ईडीला या प्रकरणाचा तपास पुन्हा सुरू करण्यास सांगितले आहे.

त्यांनी सरकारी कर्मचाऱ्याला तपासासाठी 30 ऑक्टोबरला मदुराई येथील ईडी कार्यालयात हजर राहण्यास सांगितले. त्याच्या म्हणण्यानुसार, सरकारी कर्मचारी आल्यावर त्याच्याकडे तपास बंद करण्यासाठी 3 कोटी रुपये मागितले गेले आणि शेवटी 51 लाख रुपयांचा तगादा लावला गेला.

पोलिसांनी सापळा रचला

1 नोव्हेंबर रोजी सरकारी कर्मचाऱ्याने ईडी अधिकाऱ्याला 20 लाख रुपयांचा पहिला हप्ता दिल्याचा आरोप आहे. यानंतर तिवारी म्हणाले की, पैसे इतर अधिकाऱ्यांमध्येही वाटून घ्यावे लागतील, त्यामुळे संपूर्ण रक्कम द्यावी लागेल. न दिल्यास कारवाई केली जाईल.

यानंतर सरकारी कर्मचाऱ्याने 30 नोव्हेंबरला डीव्हीएसीच्या दिंडीगुल युनिटमध्ये त्याच्याविरुद्ध तक्रार दाखल केली. पोलिसांनी त्याला पकडण्यासाठी सापळा रचला आणि 20 लाख रुपये देण्याचे आश्वासन देत सरकारी कर्मचाऱ्याला अंकितला बोलावण्यास सांगितले. त्यानुसार, 1 डिसेंबर रोजी तो एका सरकारी कर्मचाऱ्याला त्याच्या कारमध्ये भेटण्यासाठी गेला आणि तो लाच म्हणून पैसे घेत असताना त्याला रंगेहात पकडण्यात आले.