भाजप नेते बाबुल सुप्रियो यांनी तृणमूल काँग्रेसमध्ये प्रवेश केला आहे. तृणमूल काँग्रेसच्या अधिकृत ट्विटर हँडलवरून ही माहिती देण्यात आली आहे. जुलै महिन्यात मोदी सरकारनं मंत्रिमंडळ विस्तार केला होता. यावेळी इतर अनेक मंत्र्यांप्रमाणे पश्चिम बंगालचे बाबुल सुप्रियो यांनासुद्धा मंत्रीपदावरून काढून टाकण्यात आलं. पश्चिम बंगालमधील पक्षाच्या खराब कामगिरीमुळे ही कारवाई झाल्याचं मानलं गेलं.
मंत्रिमंडळातून काढून टाकल्यानंतर सुप्रियो यांनी खासदारकीचा राजीमाना दिला होता, तसंच आपण राजकीय संन्यास घेत असल्याचं जाहीर केलं होतं. जुलै महिन्यात फेसबुक पोस्टद्वारे सुप्रियो यांनी आपल्या भावना व्यक्त केल्या होत्या.