नागालँडमध्ये 14 जणांच्या मृत्यूने सर्वांनाच हादरवून सोडले आहे. ही घटना का आणि कशी घडली याबाबत वेगवेगळे दावे केले जात आहेत. सूत्रांच्या हवाल्याने माहिती मिळाली आहे की हे गुप्तचर यंत्रणांचे अपयश नाही. बंडखोर गटाचे लोक कोठे जात आहेत याविषयी इन्सर्जन्सी टास्क फोर्सकडून विश्वसनीय माहिती देण्यात आल्याचे सांगण्यात येत आहे. नागालँडमधील मोन जिल्ह्यात सुरक्षा दलांनी केलेल्या गोळीबाराच्या तीन घटनांमध्ये 14 जण ठार तर 11 जण जखमी झाले आहेत. पोलिसांनी रविवारी सांगितले की, गोळीबाराची पहिली घटना ही कदाचित चुकीच्या ओळखीतून घडली असावी. त्यानंतर झालेल्या दंगलीत एका जवानाचाही मृत्यू झाला होता.
दोन्ही एजन्सींकडून गुप्तचर माहिती तपासणे आवश्यक असल्याचे सूत्रांनी सांगितले. ज्यामध्ये लष्कर आणि टास्क फोर्सचा समावेश आहे. मात्र, शेवटच्या क्षणी कोणीतरी बंडखोरांना माहिती दिल्याने स्थानिक लोकांना त्या आंदोलनात
घुसवण्यात यश आल्याचे गुप्तचर सूत्रांनी सांगितले. सूत्रांनी दिलेल्या माहितीनुसार, टास्क फोर्समध्ये सामान्य नागरिक सामील झाल्याची माहिती नव्हती. एवढेच नाही तर यादरम्यान कारवाईची योजनाही तयार करण्यात आली होती.
गावकऱ्यांनी बंडखोरांना हल्ल्यापासून वाचवण्याचा प्रयत्न केला असावा आणि ते मारले गेले असाही दावा केला जात आहे. हे लोक वेळोवेळी नागांना पाठिंबा देत असल्याचेही सूत्रांचे म्हणणे आहे.
चौकशीचे आदेश
लष्कराने या घटनेच्या 'कोर्ट ऑफ इन्क्वायरी'चे आदेश देत म्हटले की, यादरम्यान एका लष्करी जवानाचा मृत्यू झाला आणि इतर अनेक सैनिक जखमी झाले. त्यात म्हटले आहे की ही घटना आणि त्यानंतर जे घडले ते "अत्यंत खेदजनक" आहे आणि अपघाताच्या दुर्दैवी घटनेची उच्च स्तरावर चौकशी केली जात आहे. अधिकाऱ्यांनी सांगितले की, राज्य सरकारने आयजीपी नागालँड यांच्या अध्यक्षतेखाली पाच सदस्यीय विशेष तपास पथक (एसआयटी) स्थापन केले आहे.
काय आहे संपूर्ण प्रकरण?
गोळीबाराची पहिली घटना शनिवारी संध्याकाळी पिकअप व्हॅनमध्ये कोळसा खाणीतील काही कामगार गाणे म्हणत घरी परतत असताना घडली. नॅशनल सोशालिस्ट कौन्सिल ऑफ नागालँड-के (NSCN-K)या बेकायदेशीर
संघटनेच्या युंग ओंग गटाच्या अतिरेक्यांच्या हालचालींची माहिती लष्कराच्या जवानांना मिळाली होती आणि या गैरसमजातून या भागात कार्यरत असलेल्या लष्कराच्या जवानांनी वाहनावर गोळीबार केला. ज्यामध्ये सहा मजुरांना जीव गमवावा लागला.