सातारा येथून माहूरला रेणूकामातेच्या दर्शनासाठी जात असलेल्या हिरकणी बाईक राईड ग्रुपच्या शुभांगी संभाजी पवार (३२) यांचा भोकरफाटा येथे टँकरच्या चाकाखाली येवून अपघात झाला. यात त्यांचा जागीच मृत्यू झाला. ही घटना मंगळवारी (ता.१२) सकाळी १० च्या सुमारास घडली.
शुभांगी या सातारा येथील हिरकणी ग्रुपच्या महिला बाईक राईड करत महाराष्ट्रातील साडेतीन शक्तीपीठांचे दर्शन घेण्यासाठी निघाल्या होत्या.
डोक्यावरुन टँकर गेल्याने मृत्यू
सातारा येथील हिरकणी ग्रुपच्या नऊ महिला सदस्या १० ऑक्टोबर रोजी एक हजार ८६८ किमी प्रवासासाठी मोटार सायकलने नवरात्रोत्सवात आदिशक्तीच्या साडेतीन आशक्तीपिठांचे दर्शन घेण्यासाठी मोटारसायकलवर निघाल्या होत्या. त्यांनी कोल्हापूरातील महालक्ष्मी मंदिरात दर्शन घेऊन ते तुळजापूर पोहोचल्या. आई तुळजाभवानीचे दर्शन करून पुढील माहूरगडात रेणुकामातेच्या दर्शनासाठी जात असताना भोकरफाटा दाभड येथे शुभांगी पवार यांची मोटारसायकल क्रमांक (एम.एच.११ सी.ए.१४४७) स्लीप झाली. त्याच वेळी पाठिमागून आलेला टँकर क्रमांक (जि.जे.१२ ए. टी. ६९५७) च्या खाली वाहन येऊन पाठीमागील चाकाखाली चेंगरुन शुभांगी यांचा मृत्यू झाला. विशेष म्हणजे डोक्यावर असलेले हेल्मेट शरिरापासून वेगळे होवून पडले होते.