शिर्डी येथील साईबाबा संस्थान ट्रस्टचे अध्यक्ष सुरेश काशिनाथ हावरे यांना राज्य सरकारकडून राज्यमंत्रीपदाचा दर्जा देण्यात आला आहे. बुधवारी झालेल्या मंत्रीमंडळाच्या बैठकीत हा निर्णय घेण्यात आला. यापूर्वी मुंबईच्या श्री सिद्धिविनायक गणपती मंदिर न्यासाचे अध्यक्ष आदेश बांदेकर यांना राज्यमंत्रीपदाचा दर्जा देण्यात आला होता.
श्री साईबाबा संस्थान ट्रस्ट देशातील सर्वांधिक श्रीमंत मंदिर ट्रस्टपैकी एक आहे. या ट्रस्टची वार्षिक उलाढाल ७०० कोटी रुपये इतकी असून २१०० कोटी रुपयांच्या मुदत ठेवी आहेत. तसेच प्रत्येक दिवशी २ कोटी रुपयांचे उत्पन्न देणगीच्या स्वरुपात ट्रस्टला प्राप्त होते. ट्रस्टने राज्यातील यवतमाळ, नागपूर, चंद्रपूर आणि औरंगाबाद येथील ४ वैद्यकीय महाविद्यालयांना ७१ कोटी रुपयांचे दान देण्याचा निर्णय नुकताच ट्रस्टने घेतला आहे.