रायगड जिल्ह्यात पोलिस विभागात काळिमा फासणारी घटना उघडकीस आली आहे. प्रशिक्षणार्थी पोलिस महिलेवर प्रशिक्षण देणार्‍या पोलिसांने बलात्कार केल्याचा धक्कदायक प्रकार चव्हाट्यावर आला आहे. गेल्या दीड दोन वर्षांपासून हा प्रकार सुरू होता. या घटनेवरून पोलिस विभागातील महिलांचा सुरक्षितेतचा मुद्दा पुन्हा एकदा ऐरणीवर आला आहे.
राज्याचे गृहमंत्री आर आर पाटील आपल्या भाषणांमध्ये महिला सुरक्षेची सातत्याने हमी देतात. परंतु त्यांच्या पोलिस विभागात कुंपण शेत खात असल्याचे प्रकार खुलेआम घडत आहेत.
म‍िळालेल्या माहितीनुसार, अलिबागमध्ये पोलिस प्रशिक्षणार्थी म्हणून काम करणार्‍या युवतीवर खाकी वर्दीतल्या एका नराधमाने बलात्कार केला. नागेश गावडे याचं लग्न झालेलं असतानाही त्यानं पीडित युवतीला लग्नाचं अमिष दाखवून गेल्या दीड-दोन वर्षांपासून शारिरीक संबंध ठेवले. संतापजनक बाब म्हणजे त्याची व्हिडिओ क्लिप तयार करून ती आपल्या मित्रांना पाठवली. झाला प्रकार लक्षात आल्यानंतर सहा महिन्यांपूर्वी या तरुणीने अलिबाग पोलिस स्टेशनला लेखी तक्रार दिली. मात्र, तिच्या या तक्रारीकडे वरिष्ठांनी साफ दुर्लक्ष केले. त्यामुळे वरीष्ठांबाबतही संक्षयास्पद परिस्थिती निर्माण झाली आहे. .
आरोपी सध्या अलिबाग पोलिसांच्या ताब्यात असला, तरी महिन्यांपूर्वी तक्रार देवूनही पोलिसांनी काहीच कारवाई न केल्यानं गुन्ह्याचा तपास जिल्ह्याबाहेरच्या सक्षम यंत्रणेनं करावा अशी मागणी महाराष्ट्र नवनिर्माण सेनेने केली आहे.