गोपीचंद यांनी कन्येसाठी मला डावलले

बॅडटिंनपटू अपर्णा बालनचा गंभीर आरोप

भारतीय बॅडमिंटन संघाचे मुख्य प्रशिक्षक पुलेला गोपीचंद यांची मुलगी गायत्री हिची आशियाई खेळासाठी भारतीय बॅड‍मिंटन संघात निवड करण्यात आली आहे.

भारतीय बॅडमिंटन संघटनेने आशियाई खेळासाठी भारताच्या 20 सदस्यीय संघाची नुकतीच घोषणा केली. 18 ऑगस्ट ते 2 सप्टेंबर दरम्यान इंडोनेशियातील जाकार्ता शहरात आशियाई खेळांचे आयोजन करण्यात आले आहे. यातील पुरुष संघाचे नेतृत्व किदाम्बी श्रीकांतकडे तर महिला संघाचे नेतृत्व सायना नेहवालकडे सोपवण्यात आले आहे.

या संघातून अनुभवी महिला बॅडमिंटनपटू अपर्णा बालन हिला वगळण्यात आले होते. या संबंधी अपर्णा हिने बॅडमिंटन असोसिएशन ऑफ इंडिया (बाई) आणि प्रशिक्षक पुलेला गोपीचंद, कन्या गायत्री गोपीचंद आणि आकर्षी कश्यप यांच्याविरोधात केरळच्या उच्च न्यायालयात याचिका दाखल केली आहे.

31 वर्षीय अपर्णा हिने 29 जून 2018 रोजी दाखल केलेल्या याचिकेत तिला संघातून वगळण्यात येणे हे अयोग्य आहे, असे म्हटले आहे. आपली कन्या गायत्री हिला संघात स्थान मिळावे, या कारणास्तव मला या संघातून वगळण्याचा निर्णय गोपीचंद यांनी घेतला असल्याचा आरोप तिने या याचिकेत केला आहे.