देशातील 10 राज्यांमध्ये जमावबंदी लागू

राज्यातील कोरोना परस्थिती पुन्हा ढसळण्याची शक्यता आहे. ओमिक्रॉनची वाढणारी रुग्णसंख्या पाहता राज्यात पुन्हा रात्रीची संचारबंदी लागू शकते. मुख्यमंत्री उद्धव ठाकरे यांनी कालच टास्क फोर्सची बैठक घेतली.

ओमायक्रॉन प्रकारांचा धोका लक्षात घेता, 10 राज्यांमध्ये निर्बंध जाहीर करण्यात आले आहेत. ख्रिसमस आणि नववर्षापूर्वी वाढणारी गर्दी थांबवण्याचा यामागचा हेतू आहे. गर्दीवर नियंत्रण ठेवण्यासाठी देशातील चार राज्यांमध्ये रात्रीचा कर्फ्यूही लागू करण्यात आला आहे. दिल्ली, कर्नाटक आणि ओडिशामध्ये ख्रिसमस आणि नवीन वर्ष मोठ्या प्रमाणात एकत्र येत साजरे करण्यास बंदी घालण्यात आली आहे.

4 राज्यांमध्ये रात्रीचा कर्फ्यू

मध्य प्रदेश: राज्य सरकारने मध्य प्रदेशात गुरुवारपासून रात्रीचा कर्फ्यू लागू केला आहे. रात्रीच्या कर्फ्यूची वेळ रात्री 11 ते पहाटे 5 वाजेपर्यंत आहे. जिम, कोचिंग सेंटर, थिएटर, सिनेमा हॉल यांसारख्या मोठ्या गर्दीच्या ठिकाणी फक्त पूर्ण लसीकरण झालेल्या लोकांनाच प्रवेश दिला जाईल.

उत्तर प्रदेश : उत्तर प्रदेशमध्ये शुक्रवारी रात्रीपासून नाईट कर्फ्यू जाहीर करण्यात आला आहे. याशिवाय राज्य सरकारने नोएडा आणि लखनऊमध्ये 31 डिसेंबरपर्यंत कलम 144 लागू केले आहे.

गुजरात : राज्य सरकारने अहमदाबाद, राजकोट, सुरत, वडोदरा, जामनगर, भावनगर, गांधीनगर आणि जुनागड या शहरांमध्ये 31 डिसेंबरपर्यंत रात्रीचा कर्फ्यू लागू केला आहे. लोकांना मध्यरात्रीपर्यंत होम डिलिव्हरी आणि टेक-अवे सेवांना परवानगी देण्यात आली आहे.

राजस्थान : राज्यात कोरोनाची दुसरी लाट आल्यापासून लागू करण्यात आलेला नाईट कर्फ्यू अजूनही सुरूच आहे. मात्र, राज्यात कोविडची प्रकरणे कमी होत असताना, कडकपणा शिथिल करण्यात आला. मात्र ओमायक्रॉनच्या पार्श्वभूमीवर सरकार पुन्हा एकदा सतर्क झाले आहे.

या राज्यांमध्ये ख्रिसमस-नववर्ष सेलिब्रेशनवर बंदी

दिल्ली : डीडीएमएच्या आदेशानुसार, पुढील आदेशापर्यंत हॉटेल, बार किंवा रेस्टॉरंटमध्ये 50 टक्क्यांहून अधिक लोकांना बसता येणार नाही. राजधानीत ख्रिसमस आणि नवीन वर्षाच्या पार्ट्यांवरही बंदी घालण्यात आली आहे.

तामिळनाडू : राज्यातील हॉटेल आणि क्लबमध्ये फक्त लसीकरण झालेल्या लोकांनाच प्रवेश दिला जाईल. नवीन वर्ष आणि ख्रिसमसच्या उत्सवांवर कोणतेही बंधन नाही.

ओडिशा : राज्यात लोक नवीन वर्षाचे सार्वजनिकपणे उत्सव साजरे करू शकणार नाहीत. हॉटेल, रेस्टॉरंट आणि सार्वजनिक ठिकाणी 31 डिसेंबर आणि 1 जानेवारीला बंदी असेल.

तेलंगणा : तेलंगणामध्ये आतापर्यंत कोरोनाच्या नवीन ओमायक्रॉन प्रकाराची 38 प्रकरणे नोंदवली गेली आहेत. राज्यातील गडेम नावाच्या गावात ओमायक्रॉन प्रकाराचे प्रकरण समोर आले आहे. यानंतर खबरदारी घेत लोकांनी गावात 10 दिवसांचा लॉकडाऊन लागू केला आहे.

कर्नाटक : कर्नाटकमध्ये 30 डिसेंबर ते 2 जानेवारी या कालावधीत नवीन वर्ष साजरे करण्यावर बंदी घालण्यात आली आहे. लोक कोणत्याही निर्बंधांशिवाय ख्रिसमस साजरा करू शकतात. मात्र चर्चमधील गर्दीवर नियंत्रण ठेवण्याचे आदेश देण्यात आले आहेत.