गोवा विधानसभा निवडणुकीच्या मतमोजणीचे सुरुवातीचे ट्रेंड राज्यात त्रिशंकू विधानसभेचे संकेत देत आहेत. अशात भाजप, एमजीपी सरकार स्थापनेसाठी ‘हॅटट्रिक’ करू शकते, असे राजकीय विश्लेषकांचे म्हणणे आहे.
गोव्यातील सर्व 40 विधानसभा जागांच्या सुरुवातीच्या ट्रेंडनुसार, भाजप 19 जागांवर, काँग्रेस 10, एमजीपी चार आणि आप दोन जागांवर आघाडीवर आहे. तर GFP आणि रिव्होल्युशनरी गोअन्स पार्टी (RGP) उमेदवार प्रत्येकी एका जागेवर आघाडीवर आहे, तर अपक्ष उमेदवार तीन जागांवर आघाडीवर आहेत.
गोव्याच्या परवारी विधानसभा मतदारसंघातून भाजपच्या रोहन खोंटे यांनी तृणमूल काँग्रेसच्या संदीप वाजकर यांचा 7950 मतांनी पराभव केला आहे.
गोवा निवडणूक निकाल 2022: भाजपचे उमेदवार अतानासिओ 'बाबुश' मोन्सेरात यांनी माजी मुख्यमंत्री मनोहर पर्रीकर यांचे पुत्र आणि अपक्ष उमेदवार उत्पल पर्रीकर यांचा 700 मतांच्या फरकाने पराभव करून पणजी मतदारसंघात विजय मिळवला.
गोवा निवडणूक निकाल 2022: आम आदमी पार्टीचे क्रुझ सिल्वा गोव्यातील वेलीम जागेवरून विजयी झाले आहेत.
एका ज्येष्ठ राजकीय विश्‍लेषकाने सांगितले की, गोव्यात कोणताही पक्ष स्वबळावर बहुमताचा आकडा (21 जागा) गाठत नसल्यामुळे, राज्यात पुढील सरकारच्या स्थापनेत एमजीपी महत्त्वाची भूमिका बजावू शकते.
एमजीपीचे उपमुख्यमंत्रीपद आणि महत्त्वाच्या मंत्रिपदांच्या बदल्यात भाजपला पाठिंबा देण्यास अधिक वाव असल्याचे ते म्हणाले.
निवडणूक आयोगाच्या वेबसाइटनुसार गोव्याचे मुख्यमंत्री आणि भाजपचे ज्येष्ठ नेते प्रमोद सावंत हे राज्यातील सांखळी मतदारसंघात आघाडीवर आहेत, तर मुख्यमंत्रिपदाचे प्रबळ दावेदार मानले जाणारे आरोग्यमंत्री विश्वजित राणे वाळपोई मतदारसंघात आघाडीवर आहेत.
गोव्यात 14 फेब्रुवारी रोजी झालेल्या विधानसभेच्या 40 जागांसाठी मतमोजणी सुरू आहे.
राज्यात सत्ताधारी भाजप सलग तिसऱ्यांदा सरकार स्थापन करण्याच्या प्रयत्नात आहे. त्याचवेळी, विरोधी काँग्रेसला 2017 च्या घडामोडींची पुनरावृत्ती टाळण्यासाठी पूर्ण बहुमताची आशा आहे.
2017 च्या विधानसभा निवडणुकीत काँग्रेस सर्वात मोठा पक्ष म्हणून उदयास आला, परंतु भाजपने इतर पक्षांसोबत युती करून सरकार स्थापन करण्यापासून रोखले.