T20I मध्ये दोन शतके करणारा सूर्यकुमार दुसरा भारतीय

भारत आणि न्यूझीलंड यांच्यातील तीन सामन्यांच्या टी-20 मालिकेतील दुसरा सामना माऊंट मौनगानुई येथे खेळला गेला. या सामन्यात जगातील नंबर वन टी-20 फलंदाज भारताच्या सूर्यकुमार यादवने 51 चेंडूत 111 धावांची नाबाद खेळी केली. त्याचे हे टी-20 आंतरराष्ट्रीय (T20I) दुसरे शतक आहे. या वर्षाच्या सुरुवातीला सूर्यकुमारने इंग्लंडविरुद्ध 55 चेंडूत 117 धावांची खेळी केली होती. त्या सामन्यात त्याने 48 चेंडूत शतक झळकावले, तर न्यूझीलंडविरुद्ध सूर्याने 49 चेंडूत शतक पूर्ण केले. प्रथम फलंदाजी करताना भारताने 20 षटकांत 6 गडी गमावून 191 धावा केल्या. प्रत्युत्तरात न्यूझीलंडचा संघ 18.5 षटकांत 126 धावांवर गारद झाला. टीम इंडियाने हा सामना 65 धावांनी जिंकला आणि मालिकेत 1-0 अशी अभेद्य आघाडी घेतली.

सूर्यकुमारने आपल्या खेळीत 11 चौकार आणि सात षटकार मारले.एका वर्षात T20 आंतरराष्ट्रीय सामन्यांमध्ये दोन शतके झळकावणारा सूर्यकुमार हा भारताचा दुसरा फलंदाज ठरला आहे. 

यापूर्वी 2018 मध्ये रोहित शर्माने हे केले होते. T20 आंतरराष्ट्रीय सामन्यांमध्ये सर्वाधिक शतके झळकावण्याचा विक्रम रोहितच्या नावावर आहे. या फॉरमॅटमध्ये त्याने चार शतके झळकावली आहेत. त्याचबरोबर चेक रिपब्लिकचा एस.द्वीजी, ऑस्ट्रेलियाचा ग्लेन मॅक्सवेल आणि न्यूझीलंडचा कॉलिन मुनरो यांनी प्रत्येकी तीन शतके झळकावली आहेत.

सूर्यकुमारची 111 ही टी-20 मध्ये न्यूझीलंडविरुद्ध भारतीय फलंदाजाची सर्वोत्तम धावसंख्या आहे. भारतासाठी टी20 मधील ही चौथी सर्वोत्तम खेळी आहे. विराट कोहलीने यावर्षी दुबईत अफगाणिस्तानविरुद्ध 61 चेंडूत 122 धावांची नाबाद खेळी खेळली. 

Edited By - Priya Dixit