माणुसकीला काळीमा फासणारी घटना गुजरातमध्ये समोर आली आहे. येथे एका क्रूरमातेने आपल्याच तीन महिन्यांच्या आजारी मुलीला रुग्णालयाच्या तिसऱ्या मजल्यावरून खाली फेकून मारले.अहमदाबादमधील सिविल हॉस्पिटलमध्ये ही हृदयद्रावक घटना घडल्याचे त्यांनी सांगितले. सध्या आरोपी आईला सोमवारी अटक करण्यात आली आहे.
अहमदाबादच्या असरवा भागात असलेल्या सिव्हिल हॉस्पिटलमध्ये रविवारी पहाटे ही घटना घडली. सुरुवातीला आरोपी आईने मुलगी बेपत्ता असल्याचे सांगून रुग्णालय प्रशासनाची दिशाभूल करण्याचा प्रयत्न केला, मात्र सीसीटीव्ही फुटेज तपासले असता परिस्थिती स्पष्ट झाली. अमरीन असे मृत मुलीचे नाव असून ती गेल्या दोन आठवड्यांपासून सिव्हिल हॉस्पिटलमध्ये दाखल असल्याचे त्यांनी सांगितले.
सीसीटीव्ही फुटेजमध्ये आरोपी आई आपल्या मुलीला गॅलरीत घेऊन जाताना आणि नंतर रिकाम्या हाताने परत येताना दिसत आहे. यानंतर अमरीनचा मृतदेह हॉस्पिटलच्या कर्मचाऱ्यांना तळमजल्यावर सापडला. चौकशी केल्यानंतर महिलेने गुन्ह्याची कबुली दिली आहे.
याबाबत मुलीच्या वडिलांनी रविवारी शाहीबाग पोलिस ठाण्यात माहिती दिल्याचे त्यांनी सांगितले. त्यानंतर या प्रकरणी एफआयआर दाखल करण्यात आला. नोंदवलेल्या एफआयआरनुसार, मृत मुलगी जन्मानंतर लगेचच आजारी पडली. त्यामुळे त्यांच्यावर वडोदरा येथील एसएसजी रुग्णालयात शस्त्रक्रिया करण्यात आली. जिथे तिला 24 दिवस दाखल करण्यात आले होते. मुलाचे वडील आसिफ यांनी पोलिसांना सांगितले की, वडोदरा येथील डॉक्टरांनी दूषित पाण्याच्या सेवनामुळे हा आजार झाल्याचे सांगितले. त्यानंतर मुलीची प्रकृती अधिकच बिघडल्याने तिला 14 डिसेंबर रोजी नडियाद येथील रुग्णालयात नेण्यात आले. तेथून त्यांना अहमदाबादच्या सिव्हिल हॉस्पिटलमध्ये रेफर करण्यात आले. एफआयआरमध्ये मुलीच्या पोटातून आतड्याचा एक भाग बाहेर आल्याचे सांगण्यात आले आहे.
सध्या या प्रकरणातील आरोपी आईने आपला गुन्हा मान्य केला आहे. याप्रकरणी पोलीस कारवाई करत आहेत.