पुण्यात DRDO संचालकाला ATS कडून अटक, हनीट्रॅपमध्ये सापडून पाकिस्तानला माहिती दिल्याचा संशय

R S

संरक्षण संशोधन संस्थेच्या (DRDO) संचालक पदावर काम करत असलेल्या संचालकाला दहशतवादी विरोधी पथकाने कारवाई करत अटक केली आहे. डीआरडीओचे संचालक हे पाकिस्तानच्या इंटेलिजन्सच्या हनी ट्रॅपमध्ये अडकले होते. त्यानंतर पाकिस्तानच्या इंटेलिजन्स ऑपरेशनमध्ये सहभागी होऊन त्यांनी पाकिस्तानला माहिती पुरवल्याचा धक्कादायक प्रकार समोर आला आहे. यामुळे आता दहशतवादी विरोधी पथकाने संचालकवर मोठी कारवाई केली आहे. एटीएसने त्यांच्यावर मुंबईत गुन्हा दाखल केला आहे. पुढील तपास पुणे पोलिसांकडे सोपवण्यात आला आहे. इंडियन एक्स्प्रेसने हे वृत्त दिले आहे.

प्रदीप कुराळकर हे रिसर्च अँड डेव्हलपमेंट (इंजिनिअर्स) या विभागात काम करतात. प्रदीप कुरुळकर हनी ट्रॅपमधे अडकून पाकिस्तानमधील गुप्तचर संस्थांसोबत व्हिडीओ चॅट आणि इतर सोशल मीडियाच्या माध्यमातून संपर्कात असल्याचे फेब्रुवारी महिन्यात भारतीय गुप्तचर संस्थांना लक्षात आले होते. त्यानंतर यासंबंधीची माहिती DRDO ला देण्यात आली. DRDO च्या व्हिजिलन्स विभागाने या प्रकरणाचा तपास केला आणि एक अहवाल तयार केला. या अहवालाच्या प्रती विविध भारतीय तपास यंत्रणांना देण्यात आल्या.

या अहवालाची प्रत मिळाल्यानंतर महाराष्ट्र ATS ने या प्रकरणाचा तपास केला आणि डॉक्टर प्रदीप कुरुळकर यांना अटक केली. डॉक्टर प्रदीप कुरुळकर हे या वर्षी नोव्हेंबर महिन्यात सेवानिवृत्त होणार होते. मात्र ते पाकिस्तानमधील गुप्तचर संस्थांच्या संपर्कात आल्याच तपास यंत्रणांना आतापर्यंतच्या तपासात आढळून आलं आहे. डॉक्टर प्रदीप कुरुळकर यांनी कोणती संवेदनशील माहिती पाकिस्तानला पुरवली? याचा तपास आता एटीएस कडून केला जातो आहे.
Edited by : Ratnadeep Ranshoor