खंजीर खुपसणं या शब्दाची व्याख्या आदित्य ठाकरे यांनी समजून घ्यावी. त्यांनी महाविकास आघाडीच्या नेत्यांचा फोटो लावून पुन्हा निवडून येऊन दाखवावं, अशा शब्दांत माजी नगरसेविका आणि शिवसेनेच्या शिंदे गटाच्या प्रवक्त्या शीतल म्हात्रे यांनी आदित्य ठाकरेंना आव्हान दिलं आहे.
शीतल म्हात्रे यांनी सोशल मीडियावर एक व्हीडिओ पोस्ट करून आदित्य ठाकरे यांच्यावर निशाणा साधला. त्या म्हणाल्या, "आदित्यजी, आपण आमदार झालात तेव्हा बाळासाहेब ठाकरे यांच्या फोटोसह पंतप्रधान नरेंद्र मोदी यांचा फोटो लावून मते मागितली होती. त्यामुळे आपल्या आमदार होण्यामागे भाजपचीही मते आहेत. त्यामुळे राजीनामा द्यायचा असेल तर तुम्हीच द्या आणि महाविकास आघाडीच्या नेत्यांचा फोटो लावून निवडून येऊन दाखवा."
"गेल्या अनेक दिवसांपासून पाठीत खंजीर खुपसणं, गद्दारी, विश्वासघात हे शब्द आम्ही आपल्या तोंडून ऐकत आहोत. खरंतर या शब्दांची व्याख्या समजून घेतली तर बरं होईल. आपण महाविकास आघाडी स्थापन करून सत्तेत आला आहात. त्यामुळे मतदारांच्या पाठीत खंजीर कुणी खुपसला असेल तर तो आपण खुपसलाय. आम्ही बाळासाहेब ठाकरेंचे विचार घेऊन रामराज्य आणायचा प्रयत्न करत आहोत," असंही शीतल म्हात्रेंनी म्हटलं.