मिरजेत सात किलो गांजा जप्त; सव्वा तीन लाखांचा मुद्देमाल जप्त

शहरातील एसटी स्टँडजवळ गांजा वाहतूक करणारी रिक्षा पकडून महात्मा गांधी चौकी पोलिसांच्या पथकाने कारवाई केली. या प्रकरणी संशयीत वैभव राजू कनशेट्टी (वय 30, रा. तानाजी चौक, मंगळवार पेठ, मिरज) याला अटक करण्यात आली आहे. त्याच्याकडून सहा किलो, आठशे ग्रॅमचा गांजा आणि एक रिक्षा असा तीन लाख, 20 हजारांचा मुद्देमाल जप्त केला आहे. गांजा तस्करांच्या मुळाशी पोहचून मोठ्या तस्करांचा सहभाग यातून स्पष्ट होण्याची शक्यता आहे, अशी माहिती गांधी चौकीचे पोलिस निरीक्षक सुधीर भालेराव यांनी पत्रकारांशी बोलताना दिली.

बुधवारी दुपारी तीनच्या सुमारास एसटी स्टँड परिसरात एका रिक्षातून गांजा तस्करी केली जाणार असल्याबाबत पोलिसांना गोपनीय खबऱ्यांमार्फत माहिती मिळाली होती. त्यानुसार पोलिस निरीक्षक सुधीर भालेराव यांच्या मार्गदर्शनाखाली पोलिसांनी सापळा लावला होता. या दरम्यान ग्रामीण एसटी स्थानकाजवळ रिक्षा (एमएच-10-के-3024) संशयास्पदरित्या जाताना आढळून आली. पोलिसांनी सदर रिक्षा पकडून तपासणी केली असता एका पिवळ्या रंगाच्या प्लॅस्टीक पिशवीमध्ये उग्र वासाचा हिरवट रंगाचा पाला आढळून आला. पोलिसांनी सदर पिशवी उघडून तपासणी केली असता, त्यात सुमारे सहा किलो, 800 ग्रॅम वजनाचा गांजा मिळून आला.

रिक्षा चालक असलेल्या संशयीत वैभव कनशेट्टी याला अटक कऊन रिक्षासह गांजा असा एकूण 3 लाख, 20 हजार ऊपयांचा मुद्देमाल जप्त केला. सदरचा गांजा कोठून आणला, कोठे घेऊन जाणार होता? याबाबत संशयिताकडे अधिक चौकशी सुरू आहे. दरम्यान, या गांजा तस्करी प्रकरणात आणखी काही आरोपींची नांवे निष्पन्न होण्याची शक्यता आहे. मुख्य गांजा तस्करापर्यंत पोहचण्यासाठी पोलिस कसून तपास करीत असल्याची माहिती पोलिस निरीक्षक सुधीर भालेराव यांनी दिली. या कारवाईत पोलिस उपनिरीक्षक राजू अन्नछत्रे, धनंजय चव्हाण, सचिन कुंभार, जावेद शेख, बसवराज कुंदगोळ, प्रविण हुक्कीरे या पोलिस कर्मचाऱ्यांनी भाग घेतला.

Edited By- Ratnadeep Ranshoor