महाभारत फेम शकुनी मामा रुग्णालयात दाखल

Gufi Paintal Admitted to Hospital: महाभारत शोमधील शकुनी मामाच्या व्यक्तिरेखेने घराघरात चर्चेत आलेले गुफी पेंटल रुग्णालयात दाखल आहे. त्यांची प्रकृती चिंताजनक असल्याचे सांगण्यात येत आहे. 31 मे रोजी त्यांना मुंबईतील अंधेरी येथील बेलेव्ह्यू रुग्णालयात दाखल करण्यात आले होते. 78 वर्षांच्या गूफी यांना किडनीची समस्या आहे. ते बऱ्याच दिवसांपासून आजारी होते.

रिपोर्ट्सनुसार गुफी नुकतेच फरीदाबादमध्ये होते आणि तिथे त्यांची तब्येत अचानक बिघडली. प्रथम त्यांना फरिदाबाद येथील रुग्णालयात दाखल करण्यात आले, नंतर मुंबईला हलवण्यात आले. मात्र अद्याप गुफींच्या कुटुंबीयांकडून कोणतेही वक्तव्य जारी करण्यात आलेले नाही.

टीव्ही अभिनेत्री टीना घई यांनी अभिनेता गुफींची तब्येत खालावल्याची माहिती दिली होती. अभिनेत्याचा फोटो शेअर करत त्यांनी लिहिले की, “गुफी पेंटल जी संकटात आहेत. प्रार्थना करा... ओम साई राम. यानंतर शुक्रवारी पापाराझींनीही गूफीं च्या तब्येतीची पुष्टी केली. त्यां च्या खराब प्रकृतीबद्दल ऐकून चाहते काळजीत आहेत आणि सोशल मीडियावर गुफींच्या लवकर बरे होण्यासाठी शुभेच्छा देत आहेत.

गुफी पेंटलने आपल्या करिअरमध्ये अनेक चित्रपट आणि टीव्ही मालिकांमध्ये काम केले आहे. असं म्हटलं जातं की त्यांना आधी इंजिनिअर व्हायचं होतं, पण मुंबईत आल्यानंतर ते फिल्मी दुनियेकडे वळले. त्यांनी आपल्या करिअरची सुरुवात मॉडेलिंगपासून केली आणि त्यानंतर सहाय्यक दिग्दर्शक म्हणून मनोरंजन क्षेत्रात प्रवेश केला.

गुफींनी 1975 मध्ये 'रफू चक्कर' चित्रपटाद्वारे बॉलिवूडमध्ये पदार्पण केले. यानंतर ते 'देसी परदेस', 'सुहाग' सारख्या चित्रपटात दिसले, पण त्याला खरी ओळख मिळाली ती महाभारतातील 'शकुनी मामा' या व्यक्तिरेखेने. बीआर चोप्रा दिग्दर्शित महाभारत शो 1988 मध्ये प्रसारित झाला. आजही गूफी त्याच्या चाहत्यांमध्ये मामा शकुनीच्या नावाने लोकप्रिय आहे.