भारतीय क्रिकेट नियामक मंडळाने (BCCI) इंडियन प्रीमियर लीग (IPL 2022) प्लेऑफ आणि महिला T20 चॅलेंज 2022 चे वेळापत्रक जाहीर केले आहे. आयपीएल 2022 चे प्लेऑफ सामने कोलकाता आणि अहमदाबाद येथे खेळवले जातील. क्वालिफायर 1 आणि एलिमिनेटर सामने कोलकात्यात, तर क्वालिफायर 2 आणि आयपीएल 2022 ची अंतिम फेरी अहमदाबादमध्ये खेळवली जाईल. तर, 23 मे पासून महिला टी-20 चॅलेंज 2022 पुण्यात सुरू होणार आहे.
आयपीएलने जारी केलेल्या एका प्रसिद्धीपत्रकात असे सांगण्यात आले आहे की, 24 मे रोजी आयपीएल 2022 गुणतालिकेत पहिल्या आणि दुसऱ्या क्रमांकावर असलेल्या संघादरम्यान कोलकाताच्या ईडन गार्डन्स स्टेडियमवर क्वालिफायर 1 खेळला जाईल. त्याच वेळी, 25 मे रोजी कोलकातामध्येच एलिमिनेटर सामना आयोजित केला जाईल, जो आयपीएलच्या 15 व्या हंगामातील गुणतालिकेत तिसऱ्या आणि चौथ्या क्रमांकावर असलेल्या संघांमध्ये खेळला जाईल.
आयपीएल 2022 क्वालिफायर 2 मधील एलिमिनेटरचा विजेता आणि क्वालिफायर 1 मधील उपविजेता संघ यांच्यातील सामना 27 मे रोजी अहमदाबाद येथील नरेंद्र मोदी स्टेडियमवर होणार आहे. तर, आयपीएल 2022 चा अंतिम सामना क्वालिफायर 1 चा विजेता आणि क्वालिफायर 2 मधील विजेता संघ यांच्यात खेळला जाणार आहे. हे सामने भारतीय वेळेनुसार संध्याकाळी 7.30 वाजता सुरू होतील, तर नाणेफेक संध्याकाळी 7 वाजता होईल.
BCCI ने महिला T20 चॅलेंज 2022 बद्दल घोषणा केली आहे, ज्याला मिनी महिला IPL म्हणतात, ही स्पर्धा 23 मे पासून सुरू होईल, ज्यामध्ये तीन संघ सहभागी होतील. महिलांच्या T20 चॅलेंजच्या या हंगामात सुपरनोव्हा, ट्रेलब्लेझर्स आणि व्हेलॉसिटी संघ खेळणार आहेत. पुण्यातील एमसीए स्टेडियमवर तीन साखळी सामने आणि एक अंतिम सामना असे एकूण चार सामने होणार आहेत. पहिला सामना 23 मे रोजी तर दुसरा सामना 24 मे रोजी होणार आहे. तिसरा सामना 26 रोजी तर अंतिम सामना 28 मे रोजी होणार आहे. 24 रोजी होणारा सामना दुपारी 3.30 वाजता सुरू होईल, तर उर्वरित सामने 7.30 वाजता खेळवले जातील. मात्र, कोणता संघ कोणत्या दिवशी खेळणार हे अद्याप स्पष्ट झालेले नाही.