Sant Gyaneshwar Aarti श्री ज्ञानदेवाची आरती

आरती ज्ञानराजा |

महाकैवल्यतेजा |

सेविती साधुसंत ||

मनु वेधला माझा || आरती || धृ ||

लोपलें ज्ञान जगी |

हित नेणती कोणी |

अवतार पांडुरंग |

नाम ठेविले ज्ञानी || १ || आरती || धृ ||

कनकाचे ताट करी |

 उभ्या गोपिका नारी |

नारद तुंबर हो ||

साम गायन करी || २ || आरती || धृ ||

प्रकट गुह्य बोले |

विश्र्व ब्रम्हाची केलें |

रामजनार्दनी |

पायी मस्तक ठेविले |

आरती ज्ञानराजा |

महाकैवल्यतेजा || सेविती || ३ ||

*****************

जयजयाची ज्ञानदेवा आदि देवाचिये देवा ।

संपूर्ण ज्ञानियांचा तूचि एक पूर्ण ठेवा ॥धृ॥

ब्रह्मादिक जगताचा कर्ता धरता संहरता ।

नित्यमुक्त ज्ञानरूप मायादेवीचा भर्ता ।

करोनि सर्व कांहीं स्वयें असे आकर्ता ।

ऐसि या ईश्वराची नसे तुझे ठायीं वार्ता ॥१॥

ईशजिव नानाभेदें जीच्या योगें भासला ।

अष्टधा भेदयुक्त प्रकृतीच्या परि जाला ।

जगत्पटीं ओतप्रोत अंतर्बाह्य संचला ।

ऐसाहि आदिपुरुष तुझे ठायीं नाहीं जाला ॥२॥

अधिष्ठानविवर्तत्वें वेद करिती वर्णन ।

चिच्छक्तीच्या योगें खेळे आपले ठायीं आपण ।

ऐसा जो कां परमात्मा तोही होतां स्वरूपीं लीन ।

चिच्छक्ति हे मावळलि तेथें कैचें ज्ञानाज्ञान ॥३॥

जरि कांहिं स्तुति करुं तरि येतें वाच्यपण ।

श्रुति जेथें मौनावल्या इतराचा पाड कोण ।

निरंजनरघुनाथ सांडी ओवाळोनी मन ।

मीपण हरारपलें जालें परेलागीं मौन ॥४॥

*****************

होतां कृपा तुझी पशु बोले वेद । निर्जीव चाले भिंती महिमा अगाध । भगवद्गीता टीका ज्ञानेश्वरी शुद्ध । करुनी भाविक लोकां केला निजबोध ॥१॥

जय देव जय देव जय ज्ञानसिंधू । नामस्मरणं तुमच्या तूटे भवबंधू ॥ध्रुव०॥

चौदाशें वर्षांचे तप्तीतीरवासी । येउनि चांगदेव लागति चरणांसी । करुनी कृपा देवें अनुग्रहिलें त्यांसी । देउनि आत्मज्ञान केलें सहवासी ॥२॥

समाधिसमयीं सकळ समुदाय । घेउनि सुरवर आले श्रीपंढरिराय । द्वारीं अजानवृक्ष सुवर्णपिंपळ असुमाय । जाणोनि महिमा निळा चरणातळिं राहे ॥३॥

*****************

आरती ज्ञानराजा । महाकैवल्यतेजा । सेविती साधुसंत । मनु वेधला माझा ॥ध्रु०॥

लोपलें ज्ञान जगीं । हित नेणती कोणी । अवतार पांडुरंग । नाम ठेविलें ज्ञानी ॥१॥

कनकाचें ताट करीं । उभा गोपिका नारी । नारद तुंबरू हो । साम गायन करी ॥२॥

प्रगट गुह्य बोले । विश्व ब्रह्मची केलें । रामा जनार्दनीं । पायीं ठकची ठेलें ॥३॥