प्रभू श्री रामाच्या आरत्या

नाना देही देव एक विराजे।

नाना नाटकलीला सुंदर रूप साजे।

नाना तीर्थी क्षेत्री अभिनव गति माजे।

अगाध महिमा पिंडब्रह्मांडी गाजे॥१

जयदेव जयदेव आत्मया रामा ।

निगमागम शोधीता न कळे गुणसीमा॥ध्रु.

बहुरूपी बहुगुणी बहुता काळाचा।

हरि-हर-ब्रह्मादिक देव सकळांचा।

युगानुयुगी आत्माराम आमुचा।

दास म्हणे महिमा न बोलवे वाचा॥२जय.

**********************************

स्वस्वरूपोन्मुखबुद्धि वैदेही नेली । देहात्मकाभिमाने दशग्रीवे हरिली । शब्दरूप मारुतीने सच्छुद्धि आणिली । तव चरणांबुजी येऊन वार्ता श्रृत केली । जय देव जय देव निजबोधा रामा ।। १ ।।

जय देव जय देव निजबोधा रामा । परमार्थे आरती, सद्भावे आरती, परिपूर्णकामा ।। धृ० ।।

उत्कट साधुनी शिळा सेतू बांधोनी । लिंगदेह लंकापुरी विध्वंसूनी । कामक्रोधादिक राक्षस मर्दूनी । देह अहंभाव रावण निवटोनी ।। २ ।।

प्रथम सीताशोधा हनुमंत गेला । लंका दहन करुनी अखया मारिला । मारिला जंबुमाळी भुवनी त्राहाटिला । आनंदाची गुढी घेऊनिया आला ।। ३ ।।

निजबळे निजशक्ति सोडविली सीता । म्हणुनी येणे झाले अयोध्ये रघुनाथा । आनंदे ओसंडे वैराग्य भरता । आरती घेऊनी आली कौसल्यामाता ।। ४ ।।

अनाहतध्वनि गर्जती अपार । अठरा पद्मे वानर करिती भुभुःकार । अयोध्येसी आले दशरथकुमार । नगरीं होत आहे आनंद थोर ।। ५ ।।

सहजसिंहासनी राजा रघुवीर । सोऽहंभावे तया पूजा उपचार । सहजांची आरती वाद्यांचा गजर । माधवदास स्वामी आठव ना विसर ।। ६ ।।

**********************************

जयजय रघुनंदन प्रभु, दिन दयाघना ।

भो ! अनाथनाथ तात, पतितपावना ॥धृ०॥

जयजय घननीळ घनःश्‍याम सुंदरा

जयजय गुणगंभिर धिर, विर धनुर्धंरा ।

जयजय महाराक्षस खळ, कटक मर्दना ॥जय० ॥१॥

झाला तळिं तल्पक तो, शिरिं धरी धरा ।

झाली पदकमलयुगुलिं भ्रमरि इंदिरा ।

लागलें तव गहन ध्यान, मदनदहना ॥जय० ॥२॥

जयजय रघुवीर कमल, विमल लोचना ।

जयजय भव फंद द्वंद्व, बंधमोचना ।

जयजय श्रीसच्चिद्‌घन, चित्तरंजना ॥जय० ॥३॥

भो जानकीनाथ, सदय, हृदयकोमला ।

हा प्रपंचताप निपत, नको नको मला ।

आलों तुज शरण रक्षि, न करि वंचना ॥जय० ४॥

तूं करुणामृतसिंधु दीनबंधु राघवा ।

तूं निर्गुण सगुणरुप, रंग आघवा ।

जयजय क्षिति गगनानल, जल प्रभंजना ॥जय० ॥५॥

तूं तारक भवसागरपुर, भक्‍त-सारथी ।

तुज अर्पण गंध धूप, दीप आरती ।

विष्णुदास भजन पुजन, नमन प्रार्थना ॥जय० ॥६॥

**********************************

जय देव जय देव जय चिन्मय रामा ।

आरती ओंवाळूं तुज पुरुषोत्तमा ॥ धृ. ॥

सर्वहि वस्तु तद्रूप तेज भासति रामा ।

स्थिरचर सर्वहि विश्वा तूं मंगलधामा ।

वर्णन करितां तव गुण झाली बहु सीमा ॥

कथितां मौनावली तुज मेघश्यामा ॥ जय. ॥ १ ॥

अरूप निर्गुण निर्भय सच्चितव रुप ।

प्रेमानंदे पाहतां भासें चिद्रूप ॥

अनन्याभावे भजतां होती त्वद्रूप ।

हरि तव ध्यान करितां झाला सुखरूप ॥ जय. ॥ २ ॥

**********************************

जय जय श्रीरामचंद्रा भक्तवत्सला ॥

पंचारति करितो तुज दावी पाउला ॥ धृ. ॥

अयोध्यपुर दट्टण शरयूच्या तीरी ॥

अवतरसि रवि कुळी कौसल्येमंदिरीं ॥

नगरांतील नारि सकल येति झडकरी ॥

ओंवाळीति प्रेमभरे आरती तुला ॥ जय. ॥ १ ॥

सुरवर मग पुष्पवृष्टी करुनि डोलती ॥

अप्सरादि गान अति मधुर बोलती ॥

दुष्ट दैत्य धाके बहु चित्ति पोळती ॥

त्रिभुवनांत भक्तजनां हर्ष जाहला ॥जय जय. ॥ २ ॥

पितृवचन मानुनियां विचरसी वनी ॥

दशशिर कपटे हरि जनकनंदिनी ॥

वानरदल अतितुंबळ निघसि येउनि ॥

सागरांत नामबळे सेतु बांधिला ॥ जय जय. ॥ ३ ॥

रावणादि दुष्ट दैत्य वधिसी त्यांजला ॥

विबुध मुक्त करुनि भरत राज्यिं स्थापिला ॥

जानकीसह निजगजरे येसि निजस्थळा ॥

अभयवरे विठ्ठलसुत रक्षिं आपुला ॥जय जय. ॥ ४ ॥

**********************************

जय देव जय देव जय मंगलधामा ।

भावें भजतों तुजला दे सौभाग्य रामा ॥ धृ. ॥

तव ध्यानें माझें मन मोहित झालें ॥

मनमोहन नाम तुझें म्हणूनी शोभलें ॥

भजनामृत प्रेमे प्राशन पै केलें ॥

करुणा करीं देवा सार्थक हें नमलें ॥ जय. ॥ १ ॥

देवा केले तुवां अगणित उपकार ॥

सकळहि जगताचा तूंची आधार ॥

निजभक्तांचा घेशी माथां तू भार ॥

ऎशी करुणा तुझी देवा अपार ॥ जय. ॥ २ ॥

अर्पीली काया अवघी ही तूतें ॥

पातकि आहे परि तू उद्धरी मातें ॥

शिशुहारी पडतां रक्षावें तातें ॥

सांभाळी धरुनी निजभक्तांते हाते ॥ जय. ॥ ३ ॥

आनंदाचा सतत दिन ऎसा यावा ॥

मग आम्ही प्रेमाने करूं उत्सवा ॥

दयेने तो तुवां मान्य करावा ॥

हीच प्रार्थना आहे तुजपाशी देवा ॥ जय. ॥ ४ ॥

**********************************