माजी क्रिकेटपटू राहुल द्रविड भारतीय संघाच्या प्रशिक्षकपदी विराजमान झाल्यानंतर व्हीव्हीएस लक्ष्मण राष्ट्रीय क्रिकेट अकादमीचे (एनसीए) प्रमुखपद स्वीकार करण्याची पुष्टी बीसीसीआयचे अध्यक्ष सौरव गांगुली यांनी केली आहे. भारतीय क्रिकेटच्या भल्यासाठी माजी क्रिकेटपटूंनी व्यवस्थेत यावे, असे गांगुलीने नेहमीच ठळकपणे म्हटले आहे. केवळ गांगुलीच नाही तर बोर्डाचे सचिव जय शाह आणि इतर वरिष्ठ अधिकाऱ्यांना लक्ष्मण यांनी एनसीएचे प्रमुख म्हणून काम करावे अशी इच्छा होती.
बीसीसीआयच्या सूत्रांनी सांगितले होते की, लक्ष्मणचे राहुल द्रविडसोबत खास नाते आहे हे आपण विसरू नये. हे दोघेही भारतीय क्रिकेटला पुढे नेण्यासाठी काम करणे हे खूप चांगले संयोजन असेल. विशेष म्हणजे द्रविड न्यूझीलंड विरुद्धच्या मालिकेपासून टीम इंडियाचे मुख्य प्रशिक्षक म्हणून कामाला सुरुवात करणार आहे. द्रविडने प्रशिक्षक झाल्यानंतरत्यांच्या रोडमॅप आणि माजी प्रशिक्षक रवी शास्त्री यांचा वारसा कसा पुढे चालवायचा आहे याचा उल्लेख केला आहे.
द्रविड म्हणाले होते, “भारतीय क्रिकेट संघाच्या नवीन मुख्य प्रशिक्षकपदी नियुक्ती होणे ही माझ्यासाठी सन्मानाची गोष्ट आहे आणि या भूमिकेबद्दल मी खूप उत्साहित आहे. शास्त्री यांच्या नेतृत्वाखाली संघाने खूप चांगली कामगिरी केली आहे आणि मी हे पुढे नेण्यासाठी संघासोबत काम करण्यास उत्सुक आहे. NCA, U-19 आणि India-A मधील बहुतेक मुलांसोबत जवळून काम केल्यामुळे, मला माहित आहे की त्यांच्यात दररोज सुधारण्याची आवड आणि इच्छा आहे. मी खेळाडू आणि सपोर्ट स्टाफसोबत काम करण्यास उत्सुक आहे.”
एनसीए प्रमुख झाल्यानंतर आता लक्ष्मण यांना त्यांच्या मूळ गावी हैदराबादहून बंगळुरूला जावे लागणार आहे. लक्ष्मण सध्या आयपीएलमध्ये सनरायझर्स हैदराबादचे मेंटॉर आहे. याशिवाय त्यांनी या वर्षाच्या सुरुवातीपर्यंत क्रिकेट असोसिएशन ऑफ बंगालचे फलंदाजी सल्लागार म्हणूनही काम केले आहे.