अलिबागजवळ मांडवा जेट्टीत भर समुद्रात बोट उलटूनही ७८ प्रवासी सुखरूप

मुंबई – अलिबाग प्रवासासाठी सोयीचं ठरलेल्या जलवाहतुकीतील प्रवासी बोट अलिबागमधील मांडवा जेट्टीवर उलटली होती. या बोटीतील ७८ प्रवाशांना वाचवण्यात यश आले असून आज सकाळी साडेदहा वाजता ही घटना घडली.

मांडवा जेट्टीपासून जवळच असलेल्या खडकावर ही बोट आदळल्याने हा अपघात झाला. गेट वे ऑफ इंडिया येथून अलिबागच्या दिशेने जाणारी ही प्रवासी बोट मांडवा जेट्टीपासून जेमतेम १ किलोमीटर अंतरावर असतानाच ही भीषण दुर्घटना घडली. बोटीचा अपघात झाला तेव्हा सुदैवाने जवळच पोलिसांची गस्ती बोट होती. बोटीतील कर्मचारी तसेच पोलिसांनी प्रसंगाचे गांभीर्य लक्षात घेत मदतकार्य सुरू केले. बोटीत ७८ प्रवासी होते. या सर्वांना वाचवण्यात यश आले.

गस्ती बोट तसेच स्पीड बोटच्या साह्याने सर्व प्रवाशांना मांडवा जेट्टीवर नेण्यात आले. ही बोट लाकडाची असून नियमित प्रवासीसेवा करणारी होती.