मुख्यमंत्री एकनाथ शिंदे यांच्या खासदार मुलावर महाकाल मंदिराच्या नियमांचे उल्लंघन केल्याचा आरोप

उज्जैनमधील महाकाल मंदिराचा नियम आहे की, कोणताही भाविक गर्भगृहात जाऊन पूजा करू शकत नाही, परंतु महाराष्ट्राचे मुख्यमंत्री एकनाथ शिंदे यांच्या मुलावर हा नियम मोडल्याचा आरोप आहे.

मिळालेल्या माहितीनुसार महाराष्ट्राचे मुख्यमंत्री एकनाथ शिंदे यांचे पुत्र खासदार श्रीकांत शिंदे यांच्यावर मध्य प्रदेशातील उज्जैन येथील महाकाल मंदिराचे नियम मोडल्याचा आरोप करण्यात आला असून श्रीकांत शिंदे यांनी बंदी असतानाही पत्नी आणि दोन साथीदारांसह गर्भगृहात जाऊन पूजा केल्याचा आरोप आहे. या प्रकरणावरून गदारोळ वाढू लागल्यावर प्रशासनाने याप्रकरणी योग्य ती कारवाई केली जाईल आणि कोणी दोषी आढळल्यास त्याला सोडले जाणार नाही, असे सांगितले आहे.

तसेच उज्जैन येथे महाकाल दर्शनासाठी आलेले श्रीकांत शिंदे आणि त्यांचे साथीदार मंदिराच्या गर्भगृहात प्रवेश करतानाचे फोटो आणि व्हिडिओ समोर आले असून  ते सर्व म्हणजे खासदार श्रीकांत शिंदे, त्यांच्या पत्नी आणि अन्य दोघे सायंकाळी गर्भगृहात प्रवेश करताना दिसले. या चार जणांनी महाकालाच्या  शिवलिंगाजवळ बसून पूजा केली आहे. हा व्हिडिओ सोशल मीडियावरही व्हायरल होत आहे.

नियमानुसार महाकाल मंदिराच्या गाभाऱ्यात कोणत्याही भाविकाच्या प्रवेशावर गेल्या एक वर्षापासून बंदी घालण्यात आली आहे. येथे फक्त पुजाऱ्यांनाच प्रवेश दिला जातो. तसेच महाकालेश्वर शिवलिंगापासून 50 फूट अंतरावरून दर्शन घेता येईल, असे भक्त व भक्तांसाठी नियम आहे. 4 महिन्यांत व्हीआयपींनी मंदिराचे नियम तोडण्याची ही चौथी वेळ असल्याची माहिती समोर येत आहे. 

Edited By- Dhanashri Naik