पंतप्रधानांच्या मदत पॅकेज अंतर्गत रोजगार मिळालेल्या काश्मिरी पंडितांनी 24 तासांच्या आत सरकारने त्यांना सुरक्षित ठिकाणी न पाठवल्यास ते सामूहिकपणे स्थलांतर करतील, असा इशारा दिला आहे. कुलगाम जिल्ह्यात दहशतवाद्यांकडून महिला शिक्षिकेच्या हत्येनंतर त्यांनी रस्त्यावर उतरून ठिकठिकाणी निदर्शने करत हा इशारा दिला. "आम्ही ठरवले आहे की जर सरकारने आमच्या (सुरक्षेसाठी) 24 तासांच्या आत कोणतीही ठोस पावले उचलली नाहीत, तर पुन्हा मोठ्या प्रमाणात स्थलांतर होईल," असे एका आंदोलकाने सांगितले.
ते म्हणाले की, काश्मिरी पंडितांना लक्ष्य करून त्यांची हत्या करण्याची प्रक्रिया सुरू असून, सरकारकडे दाद मागून समाज कंटाळला आहे. "आम्हाला स्थलांतरित केले पाहिजे जेणेकरून आम्हाला वाचवता येईल," तो म्हणाला. आमचे शिष्टमंडळ यापूर्वी उपराज्यपालांना भेटले होते आणि आम्ही त्यांना आम्हाला वाचवण्यास सांगितले होते. खोऱ्यातील परिस्थिती पूर्वपदावर येईपर्यंत दोन ते तीन वर्षांसाठी तात्पुरते पुनर्वसन करण्याची आमची मागणी आहे. काश्मीरच्या आयजीपींनी खोऱ्याला दहशतवादमुक्त करण्यासाठी ही मुदत दिली आहे.
जोरदार घोषणाबाजी करत रॅली काढली
अधिकाऱ्यांनी सांगितले की, काश्मिरी पंडित समाजातील काही कर्मचारी लाल चौकातील घंटा घर येथे हत्येचा निषेध करण्यासाठी जमले होते. शहरातील सोनावर भागातील बटवारा येथे कर्मचार्‍यांचा आणखी एक गट जमला आणि हिंदू समुदायातील कर्मचार्‍यांना संपूर्ण सुरक्षा सुनिश्चित करण्यात अपयशी ठरल्याबद्दल केंद्रशासित प्रदेश प्रशासनाच्या विरोधात घोषणाबाजी केली.