केंद्र शासनाने जुन्या पाचशे व एक हजार रुपयांच्या नोटा चलनातून बंद केल्यामुळे महावितरणच्या वीजग्राहकांची गैरसोय टाळण्यासाठी ज्या ग्राहकांची वीज देयक भरण्याची तारीख 9 ते 14 नोव्हेंबर या दरम्यान आहे अशा ग्राहकांना वीज देयक अथवा प्रॉॅम्ट पेमेंट भरण्यासाठी 15 नोव्हेंबर, 2016 पर्यंत मुदतवाढ देण्यात आली आहे. तसेच बिले स्वीकारण्यासाठी सुटीच्या दिवशीही आवश्यकतेनुसार महावितरणची वीजबिल भरणा केंद्र सुरु राहतील.
या संदर्भात महावितरणने परिपत्रक प्रसिद्ध केले असून त्यात ज्या वीजग्राहकांची वीज देयक अथवा प्रॉॅम्ट पेमेंटची तारीख 9 नोव्हेंबर ते 14 नोव्हेंबर या दरम्यान आहे अशा ग्राहकांना वीजबिल भरणे सोयीचे व्हावे म्हणून महावितरणने त्यांची वीजबिल भरण्याची तारीख 15 नोव्हेंबर, 2016 पर्यंत वाढवली आहे. याबाबत नागरिकांनी महावितरणला सहकार्य करावे, अशी विनंती वीजग्राहकांना केली आहे. तसेच ऑनलाईन वीजबिल भरणा करण्यासाठी ग्राहकांना महावितरणचे www.mahadiscom.in संकेतस्थळ व मोबाईल ऍ़पची सुविधा उपलब्ध आहे.