शिवाजी विद्यापीठ कोल्हापूरला नवे नाव द्या: शिंदे

शिवाजी विद्यापीठ, कोल्हापूरचे उपकेंद्र साताऱ्यात व्हावे या मागणीसाठी मंगळवारी राष्ट्रवादी विद्यार्थी काँग्रेसच्या वतीने भव्य असा मोर्चा काढण्यात आला. या मोर्चात राष्ट्रवादी काँग्रेस पार्टीचे आमदार माजी मंत्री शशिकांत शिंदे , जिल्हाध्यक्ष सुनील माने, राष्ट्रवादी विद्यार्थी काँग्रेसचे प्रदेशाध्यक्ष संग्राम कोते पाटील, राष्ट्रवादी विद्यार्थी काँग्रेसचे जिल्हाध्यक्ष अतुल शिंदे तसेच प्रदेश सचिव गजेंद्र मुसळे आणि असंख्य विद्यार्थी सहभागी झाले होते.

या मोर्चादरम्यान शिवाजी विद्यापीठ, कोल्हापूरला छत्रपती शिवाजी महाराज विद्यापीठ असे नाव देण्यात यावे अशी मागणी माजी मंत्री आमदार शशिकांत शिंदे यांनी केली. ही मागणी मान्य न झाल्यास विद्यापीठाचे कामकाज बंद पाडू असा इशारा शशिकांत शिंदे यांनी दिला. शिवाजी विद्यापीठ, कोल्हापूरचे उपकेंद्र साताऱ्यात व्हावे, विद्यार्थ्यांसाठी शहरात सुसज्ज ग्रंथालय व्हावे अशा विविध मागण्या प्रदेशाध्यक्ष संग्राम कोते पाटील यांनी केल्या. तसेच विद्यार्थ्यांवर अन्याय झाला तर तो सहन केला जाणार नाही असेही ते म्हणाले आहेत.