Eoin Morgan Retirement:अलवीदा इयॉन मॉर्गन

इंग्लंडचा स्टार क्रिकेटर आणि मर्यादित षटकांच्या संघाचा कर्णधार इऑन मॉर्गनने आंतरराष्ट्रीय क्रिकेटमधून निवृत्ती घेतली आहे. त्याच्या या निर्णयाला आयसीसी आणि इंग्लंड क्रिकेट बोर्डाने दुजोरा दिला आहे. मॉर्गनच्या या निर्णयामुळे 2006 मध्ये सुरू झालेली त्याची आंतरराष्ट्रीय कारकीर्दही संपुष्टात आली आहे. 

35 वर्षीय डावखुरा स्फोटक फलंदाज इंग्लंडचा मर्यादित षटकांच्या क्रिकेटमधील सर्वात यशस्वी कर्णधार तसेच सर्वाधिक धावा करणारा फलंदाज होता. मॉर्गनने 225 एकदिवसीय सामन्यांमध्ये 6957 धावा केल्या. यादरम्यान त्याच्या बॅटमधून 13 शतके झळकली. एकदिवसीय क्रिकेटमध्ये त्याच्या 14 शतकांसह एकूण 7701 धावा आहेत. 

मर्यादित षटकांचा इंग्लंडचा यशस्वी कर्णधार

आपल्या नेतृत्वाखाली इंग्लंडला प्रथमच एकदिवसीय विश्वचषक जिंकून देणाऱ्या मॉर्गनने १२६ सामन्यांमध्ये संघाचे नेतृत्व केले. यामध्ये त्याने 65.25 च्या विजयाच्या टक्केवारीसह 76 सामने जिंकले. इऑन हा टी-20 क्रिकेटमधील यशस्वी क्रिकेटर आणि कर्णधारही होता. त्याच्या नेतृत्वाखाली संघाने 72 पैकी 42 सामने जिंकले. तर एक खेळाडू म्हणून मॉर्गनने 115 सामन्यात 14 अर्धशतके आणि 136.18 च्या स्ट्राईक रेटच्या मदतीने 2458 धावा केल्या. 

एकदिवसीय डावात सर्वाधिक षटकार मारण्याचा विक्रम

वनडे सामन्याच्या एका डावात सर्वाधिक षटकार मारण्याचा विश्वविक्रम आजही मॉर्गनच्या नावावर आहे. 2019 च्या एकदिवसीय विश्वचषकात अफगाणिस्तानविरुद्धच्या सामन्यात त्याने 17 षटकार मारले होते. 

करिअरची सुरुवात आयर्लंडमधून केली

मॉर्गनने आपल्या आंतरराष्ट्रीय क्रिकेट कारकिर्दीची सुरुवात आयर्लंडमधून केली. 2006-2009 दरम्यान तो आयर्लंडकडून खेळला. आयर्लंडसोबतच्या तीन वर्षांच्या सहवासात, त्याने 23 एकदिवसीय सामने खेळले आणि 35.42 च्या सरासरीने 744 धावा केल्या.