Publish Date: Thu, 01 Apr 2021 (19:54 IST)
Updated Date: Thu, 01 Apr 2021 (19:56 IST)
परभणी येथील राष्ट्रवादी काँग्रेस पक्षाचे नेते राजेश विटेकर यांच्यावर एका महिलेने बलात्काराचे आरोप केले आहेत.
भूमाता ब्रिगेडच्या अध्यक्षा तृप्ती देसाई यांनी पीडित महिलेसोबत पत्रकार परिषद घेतल्यानंतर आता हे प्रकरण समोर आलं आहे.
याप्रकरणी विटेकर यांच्यावर बलात्काराचा गुन्हा दाखल करण्यात यावा, अशी मागणी देसाई यांनी केली आहे.
"माझे अश्लील व्हिडीओ तयार करण्यात आले आहेत. वर्षभरापासून माझ्यावर अत्याचार करण्यात आला. त्याचे माझ्याकडे पुरावे आहेत. मी तक्रार करुनही अद्याप गुन्हा दाखल करण्यात आला नाही. फक्त तपास सुरु असल्याचं सांगितलं जातं," अशी तक्रार संबंधित पीडित महिलेने केली आहे.
राष्ट्रवादी काँग्रेस अध्यक्ष शरद पवार यांच्यामुळे आपल्यावर गुन्हा दाखल होणार नाही, असं राजेश विटेकर म्हणतात, असा दावा पीडितेने केला आहे. राजेश विटेकर यांच्यावर गुन्हा दाखल करुन त्यांना अटक करा, यामध्ये त्यांच्या आईही सहभागी आहेत, असा आरोप तृप्ती देसाईंनी केला आहे.
राजेश विटेकर यांनी संबंधित महिलेने केलेले बलात्काराचे आरोप फेटाळून लावले आहेत.
माझ्यावरील बलात्काराचे आरोप बिनबुडाचे असून ब्लॅकमेल करण्याच्या उद्देशाने हे आरोप करण्यात आल्याची प्रतिक्रिया विटेकर यांनी दिली.
