बालगीत - अश्शी सुट्‌टी सुरेख बाई

अश्शी सुट्‌टी सुरेख बाई

हिरवळ दाटे चोहीकडे !

वहया-पुस्तके-दप्‍तरबिप्‍तर

नाही आठवत कुठे पडे !

अश्शी सुट्‌टी सुरेख बाई

सूर्यच उशिराने उठतो

डोळे उघडून बघते मी, तर

"चल गप्पा मारु" म्हणतो !

अश्शी सुट्‌टी सुरेख बाई

चंगळ होते खाण्याची

सुस्ती येता होऊन जाते

टंगळमंगळ कामाची

अश्शी सुट्‌टी सुरेख बाई

हवेत येई गंमतजंमत

किती खेळलो तरी आपले

हात-पाय नाही दमत-थकत

अश्शी सुट्‌टी सुरेख बाई

पंख फड्‌फड्‌त उडून जाते

माझ्या हाती आठवणींची

रंगित रंगित पिसे ठेवते !

कवी - अनंत भावे